Pune Liquor Case: पुणे आणि पिंपरी-चिंचवड परिसरात मिथेनॉलयुक्त गावठी दारूमुळे उद्भवलेल्या दुर्घटनेचे परिणाम दिवसागणिक अधिक भीषण होत असल्याचे समोर येत आहे. या प्रकरणात आतापर्यंत 19 जणांचा मृत्यू झाला असून उपचार घेत असलेल्या काही रुग्णांची प्रकृतीही चिंताजनक आहे. त्यातच विषारी दारूचे सेवन केलेल्या दोघांची दृष्टी गेल्याची माहिती समोर आल्याने खळबळ उडाली आहे.
अनेक रुग्णांवर अतिदक्षता विभागात उपचार
दारू प्राशनानंतर प्रकृती खालावलेल्या काही रुग्णांवर विविध रुग्णालयांत उपचार सुरू आहेत. पिंपरीतील यशवंतराव चव्हाण स्मृती रुग्णालयाच्या अतिदक्षता विभागात काही गंभीर रुग्णांवर उपचार सुरू असून त्यापैकी दोघांवर डायलिसिस करण्यात येत आहे. इतर काही बाधितांवर खासगी आणि शासकीय रुग्णालयांमध्ये वैद्यकीय उपचार सुरू आहेत. उपचाराधीन असलेल्या दोन रुग्णांची दृष्टी पूर्णपणे गेल्याचे डॉक्टरांनी निदर्शनास आणून दिले आहे.
सुरुवातीला किरकोळ त्रास, नंतर प्रकृती अचानक बिघडली
दापोडी-फुगेवाडी परिसरातील अनेकांनी मंगळवारी रात्री गावठी दारूचे सेवन केले होते. सुरुवातीला डोळ्यांत जळजळ, चक्कर आणि अस्वस्थता अशी लक्षणे दिसून आली. मात्र काही तासांतच परिस्थिती गंभीर बनली. श्वास घेण्यास त्रास, छातीत वेदना, दृष्टी धूसर होणे आणि बेशुद्धावस्था अशी लक्षणे दिसू लागल्याने अनेकांना तातडीने रुग्णालयात दाखल करावे लागले. काही जणांचा उपचार सुरू होण्यापूर्वीच मृत्यू झाला.
बाधितांचा शोध घेण्यात प्रशासनाची कसरत
विषारी दारूचे सेवन केलेल्या व्यक्तींची नेमकी संख्या अद्याप स्पष्ट झालेली नाही. अनेक जण खासगी रुग्णालयांमध्ये उपचार घेत असल्याने त्यांची माहिती गोळा करण्यासाठी पोलिस आणि प्रशासनाला मोठी मेहनत घ्यावी लागत आहे. शासकीय रुग्णालयांसह खासगी वैद्यकीय संस्थांकडून माहिती संकलित केली जात असून मृतांचा आकडा आणखी वाढण्याची भीती व्यक्त केली जात आहे.
संयुक्त कारवाईत 10 जण जेरबंद
या प्रकरणाचा तपास वेगाने सुरू असून राज्य उत्पादन शुल्क विभाग, पुणे पोलिस आणि दापोडी पोलिसांनी संयुक्त कारवाई करत आतापर्यंत 10 आरोपींना अटक केली आहे. विषारी दारूच्या निर्मिती, साठवण आणि विक्रीशी संबंधित असल्याच्या संशयावरून ही कारवाई करण्यात आली आहे. अटक करण्यात आलेल्या आरोपींविरोधात सदोष मनुष्यवध, सदोष मनुष्यवधाचा प्रयत्न, अपायकारक पदार्थांमुळे इजा पोहोचवणे आणि महाराष्ट्र दारूबंदी कायद्यांतर्गत विविध कलमांनुसार गुन्हे दाखल करण्यात आले आहेत.
मिथेनॉलच्या विषारी परिणामांमुळे वाढली चिंता
वैद्यकीय तज्ज्ञांच्या मते, मिथेनॉलचे शरीरात प्रमाण वाढल्यास दृष्टी गमावण्यापासून ते अवयव निकामी होण्यापर्यंत गंभीर परिणाम होऊ शकतात. पुणे आणि पिंपरी-चिंचवडमधील ही घटना अशाच विषारी दारूच्या घातक परिणामांचे भयावह उदाहरण ठरत असून प्रशासनाने नागरिकांना अवैध मद्यापासून दूर राहण्याचे आवाहन केले आहे.
