Maharashtra Weather Update : बंगालच्या उपसागरात तयार होणारी नवीन वादळ प्रणाली ४ नोव्हेंबरपासून चक्रीवादळात रूपांतरित होणार असून, यामुळे अंदमान आणि निकोबार बेटांसाठी हवामान खात्याने (IMD) सायक्लोन अलर्ट जारी केला आहे. मोंथा वादळाचा धोका टळला तरी या नव्या प्रणालीमुळे महाराष्ट्रासह इतर भागांत पावसाची पुन्हा हजेरी लागण्याची शक्यता आहे.
आज कोकण, मध्य महाराष्ट्र आणि मराठवाड्यात तुरळक ठिकाणी विजांसह हलक्या पावसाचा अंदाज आहे. उर्वरित राज्यात ढगाळ हवामानासह तापमानात चढ-उतार अपेक्षित आहेत. कालच्या २४ तासांत राज्यात हलक्या ते जोरदार सरी कोसळल्या, विशेषतः कोकणातील रायगड जिल्ह्यात पावसाचा जोर अधिक होता.
विशेषतः मुंबई, ठाणे, पालघर, रत्नागिरी, सिंधुदुर्ग, अहिल्यानगर, पुणे, सातारा, सांगली, सोलापूर, कोल्हापूर, बीड, हिंगोली, धाराशिव, लातूर आणि नांदेड या १५ जिल्ह्यांत विजांसह हलक्या पावसाची शक्यता आहे. बंगालच्या उपसागरातील हे चक्रीवादळ राज्याच्या हवामानावर परिणाम करू शकते, ज्यामुळे सततच्या बदलांमुळे पावसाला अनुकूल वातावरण निर्माण होत आहे. पुढील काही तास महत्त्वाचे असल्याचे IMD ने नमूद केले आहे.
