पुणे: पुणे महानगरपालिका निवडणुकीच्या पार्श्वभूमीवर कुख्यात गुंड बंडू आंदेकर यांच्या कुटुंबातील सदस्यांना निवडणूक लढवण्यासाठी विशेष मकोका न्यायालयाने परवानगी दिल्यानंतर मोठी खळबळ उडाली आहे. बंडू आंदेकर, माजी नगरसेविका लक्ष्मी आंदेकर आणि माजी नगरसेवक वनराज आंदेकर यांची पत्नी सोनाली आंदेकर या तिघांना न्यायालयाने नामांकन दाखल करण्यास हिरवा कंदील दाखवला आहे. हे तिघे सध्या आयुष कोमकर हत्याप्रकरणात न्यायालयीन कोठडीत आहेत.
या प्रकरणाची पार्श्वभूमी गेल्या वर्षीच्या टोळीयुद्धाशी निगडित आहे. २०२४ मध्ये वनराज आंदेकर यांची हत्या झाल्यानंतर, त्याचा बदला घेण्यासाठी आंदेकर टोळीने गणेश कोमकर याचा मुलगा आयुष कोमकर (वय १९) याची ५ सप्टेंबर २०२५ रोजी नाना पेठेत गोळ्या घालून हत्या केल्याचा आरोप आहे. या प्रकरणात बंडू आंदेकरसह १५ जणांना अटक करण्यात आली असून मकोका अंतर्गत कारवाई सुरू आहे.
आंदेकर कुटुंब पूर्वी अजित पवार गटाच्या राष्ट्रवादी काँग्रेसशी संबंधित होते. लक्ष्मी आणि वनराज हे माजी नगरसेवक राष्ट्रवादीतून निवडून आले होते. आता आगामी निवडणुकीत आंदेकर कुटुंबाला राष्ट्रवादीकडून किंवा इतर पक्षाकडून उमेदवारी मिळण्याच्या चर्चा सुरू आहेत. मात्र, राष्ट्रवादीच्या पुणे शहराध्यक्षांनी स्पष्ट केले आहे की, गुन्हेगारी पार्श्वभूमी लक्षात घेता आंदेकर कुटुंबाला तिकीट दिले जाणार नाही.
या घडामोडींना आयुष कोमकरच्या आई संजीवनी कोमकर यांनी सोशल मीडियावर व्हिडीओ शेअर करून तीव्र विरोध केला आहे. त्यांनी सर्व राजकीय पक्षांना कळकळीची विनंती करत म्हटले आहे, “जर आम्हाला न्याय देता येत नसेल तर अन्याय तरी करू नका. आंदेकर कुटुंबातील कोणालाही निवडणुकीचे तिकीट देऊ नका. त्यांनी माझ्या लहान मुलाचे आयुष्य उद्ध्वस्त केले आहे. सत्तेच्या जोरावर ते इतके थराला पोहोचले आहेत.”
आंदेकर कुटुंबाला तिकीट दिल्यास पक्ष कार्यालयासमोर आत्मदहन करणार असा थेट इशारा संजीवनी कोमकर यांनी दिला आहे. या व्हिडीओमुळे पुण्यातील राजकीय वर्तुळात खळबळ उडाली असून, टोळीयुद्ध पुन्हा भडकण्याची भीती व्यक्त केली जात आहे.
आंदेकर कुटुंबाची पुण्यातील गुन्हेगारी आणि राजकीय पार्श्वभूमी ४० वर्षांहून जुनी आहे. न्यायालयाच्या निर्णयामुळे निवडणूक लढवण्याचा मार्ग मोकळा झाला असला तरी जनतेकडून आणि पीडित कुटुंबाकडून होणारा विरोध आंदेकरांच्या राजकीय महत्वाकांक्षेला अडथळा ठरू शकतो, असे राजकीय विश्लेषकांचे मत आहे. निवडणुकीच्या तोंडावर ही घडामोड पुण्यातील वातावरण अधिक तणावपूर्ण करणारी ठरली आहे.
