Pune Crime: पुणे शहरात वाढत चाललेल्या टोळीयुद्ध आणि गंभीर गुन्ह्यांवर आळा घालण्यासाठी पोलिसांनी आक्रमक धोरण स्वीकारले असून संघटित गुन्हेगारीविरोधात कठोर कारवाई सुरू केली आहे. पोलीस आयुक्त अमितेश कुमार यांच्या मार्गदर्शनाखाली ‘मोक्का’सारख्या कठोर कायद्याचा आणि तडीपारीसारख्या उपायांचा प्रभावी वापर केला जात आहे. याच मोहिमेअंतर्गत, ससून रुग्णालयात तीन वर्षांपूर्वी घडलेल्या थरारक हल्ल्याशी संबंधित एका कुख्यात फरार आरोपीला अटक करण्यात पुणे पोलिसांना मोठे यश मिळाले आहे.
दरम्यान, 2022 मध्ये ससून रुग्णालयाच्या आवारात घडलेली घटना संपूर्ण शहराला हादरवणारी ठरली होती. गंभीर गुन्ह्यांत अडकलेला तुषार हंबीर याला उपचारासाठी कारागृहातून ससूनमध्ये आणण्यात आले होते. याच संधीचा फायदा घेत हल्लेखोरांच्या टोळीने रुग्णालयात घुसखोरी करत त्याच्यावर जीवघेणा हल्ला केला. कोयत्यांनी सपासप वार करण्यात आले, तसेच पिस्तुलातून गोळीबारही करण्यात आला होता. या हल्ल्यात हंबीरच्या सुरक्षेसाठी तैनात असलेला पोलीस कर्मचारी आणि त्याचा नातेवाईकही जखमी झाले होते.
हेही वाचा – Pune Cold Wave : पुणे परिसरात थंडीचा जोर कायम; पाषाणमध्ये किमान तापमान ८.३ अंशांवर
या प्रकरणी बंडगार्डन पोलीस ठाण्यात गुन्हा दाखल करण्यात आला होता. तपासादरम्यान एकूण 11 आरोपींवर आरोप करण्यात आला होता. गुन्ह्याचे स्वरूप आणि संघटित टोळीचा सहभाग लक्षात घेता सर्व आरोपींवर ‘मोक्का’ अंतर्गत कारवाई करण्यात आली. बहुतांश आरोपींना अटक झाली होती, मात्र रोहित ऊर्फ तम्मा भोसले हा आरोपी दीर्घकाळ पोलिसांना हुलकावणी देत फरार होता.
हेही वाचा – Pune Land Scam: पुणे जमीन गैरव्यवहार प्रकरणावर संजय राऊतांचं मोठं भाष्य; अजित पवारांवर थेट प्रहार, म्हणाले…
फरार आरोपीला अटक
गेल्या तीन वर्षांपासून सतत ठिकाणं बदलत तो पोलिसांच्या नजरेतून बचावत होता. अखेर गुन्हे शाखेला मिळालेल्या गोपनीय माहितीनंतर पोलिसांनी अचूक नियोजन करत सापळा रचला आणि भोसले याला अटक केली. या कारवाईमुळे ससून रुग्णालय हल्ला प्रकरणातील महत्त्वाचा आरोपी पोलिसांच्या ताब्यात आला असून, पुण्यातील संघटित गुन्हेगारीविरोधातील लढ्यात हा मोठा टप्पा मानला जात आहे.
