पिंपरी: वहिनीसोबत असलेल्या अनैतिक संबंधाला अडसर ठरत असलेल्या भावाचा त्याच्या पत्नीसोबत मिळून सख्ख्या भावाने काटा काढला. चऱ्होली येथे पठारेमळा परिसरात हा धक्कादायक प्रकार उघडकीस आला असून पोलिसांनी आरोपी भावासह पत्नीला बेड्या ठोकल्या.
धनु दादा लकडे (वय ३३, रा. काळे कॉलनी, चऱ्होली) असे खून झालेल्या भावाचे नाव आहे. या प्रकरणी लहान भाऊ सोमनाथ दादा लकडे (वय १९) व पत्नी शितल धनु लकडे (वय २५, दोघे रा.चऱ्होली) यांना अटक करण्यात आली आहे.
पोलिसांनी दिलेल्या माहितीनुसार, ५ जुलै रोजी सकाळी साडे अकाराच्या सुमारास धनु लकडे याचा मृतदेह पठारेमळा चऱ्होली येथे मिळाला, पोलिसांनी घटनास्थळी धाव घेत पाहणी केली असता त्याचा धारदार शस्त्राने डोक्यावर वार करून खून केल्याचे निदर्शनास आले. त्यानुसार खंडणी विरोधी पथक तसेच गुंडा विरोधी पथकाने समांतर तपास सुरु केला.
दरम्यान अधिक तपास करत असताना यातील फिर्यादी व मृत धनु लकडे याचा सख्खा भाऊ सोमनाथ लकडे आरोपी असल्याची माहिती मिळाली. त्यानुसार पोलिसांनी त्याला ताब्यात घेऊन चौकशी केली असता शितल लकडे हिच्या बरोबर अनैतिक संबंध असल्याचे सांगितले. तसेच भाऊ अनैतिक संबंधाला अडचण ठरत असल्याने दोघांनी मिळून त्याचा काटा काढण्याचा कट रचल्याचे सांगितले. त्यानुसार पोलिसांनी शितल लकडे हिला ताब्यात घेतले.
ही कारवाई पोलीस आयुक्त विनयकुमार चौबे, अपर आयुक्त सारंग आवाड, उपायुक्त डॉ. शिवाजी पवार यांच्या मार्गदर्शनाखाली गुंडा विरोधी पथक आणि खंडणी विरोधी पथकाने केली. पुढील तपास दिघी पोलीस करत आहे.
