Petrol-Diesel Prices : देशभरातील नागरिकांना पुन्हा एकदा महागाईचा फटका बसला आहे. व्यावसायिक गॅस सिलिंडर आणि सीएनजी दरवाढीनंतर आता पेट्रोल-डिझेलचे दरही वाढले आहेत. तेल कंपन्यांनी शुक्रवारी पेट्रोल आणि डिझेलच्या दरात प्रति लिटर सुमारे ३ रुपयांची वाढ जाहीर केली आहे. त्यामुळे मुंबई, पुणे, नाशिकसह अनेक शहरांमध्ये इंधनाचे दर शंभरीपार गेले आहेत.
मुंबईत पेट्रोलच्या दरात ३.१४ रुपयांची वाढ झाली असून आता पेट्रोल १०६.६८ रुपये प्रति लिटर झाले आहे. तर डिझेल ३.११ रुपयांनी महागून ९३.१४ रुपये प्रति लिटरवर पोहोचले आहे.
प्रमुख शहरांतील नवीन इंधन दर
- मुंबई : पेट्रोल 106.68, डिझेल ₹93.14
- नाशिक : पेट्रोल 107.93, डिझेल ₹94.41
- दिल्ली : पेट्रोल 97.77, डिझेल ₹90.67
- कोलकाता : पेट्रोल 108.74, डिझेल ₹95.13
- चेन्नई : पेट्रोल 103.67, डिझेल ₹95.25
याशिवाय पुणे, ठाणे, परभणी, सोलापूर, छत्रपती संभाजीनगर, जळगाव, कोल्हापूर आणि नागपूरमध्येही इंधनाच्या दरात मोठी वाढ झाली आहे.
दरम्यान, अमेरिका-इराण संघर्ष आणि होर्मुझ सामुद्रधुनीतील तणावामुळे जागतिक ऊर्जा बाजारावर परिणाम होत आहे. याच पार्श्वभूमीवर इंधन दरवाढ झाल्याचे सांगितले जात आहे.
मात्र, केंद्र सरकारने देशात इंधन टंचाई नसल्याचे स्पष्ट केले आहे. Neeraj Mittal यांनी अलीकडेच सांगितले की, देशाकडे सध्या सुमारे ६० दिवसांचा इंधन साठा आणि ४५ दिवसांचा एलपीजी साठा उपलब्ध आहे. त्यामुळे पेट्रोल, डिझेल किंवा गॅसचे रेशनिंग लागू करण्याचा कोणताही विचार नसल्याचे त्यांनी स्पष्ट केले.
