Pune Passport Office: पुणे पासपोर्ट प्रशासनाने एक मोठा बदल जाहीर केला आहे. मुंढवा येथील ‘झीरो वन’ इमारतीत गेल्या अनेक वर्षांपासून कार्यरत असलेले ‘पासपोर्ट सेवा केंद्र’ (PSK) आता कायमस्वरूपी बंद होऊन पाषाण येथे स्थलांतरित होणार आहे. येत्या ३० मार्च २०२६ पासून या नवीन कार्यालयातून नागरिकांना सेवा दिली जाईल. प्रामुख्याने बाणेर, पाषाण, औंध, बावधन आणि हिंजवडी आयटी पार्क परिसरातील रहिवाशांसाठी हे केंद्र आता अधिक जवळ आणि सोयीचे ठरणार आहे.
नवीन कार्यालयाचा पत्ता आणि ठिकाण
वाढती गर्दी आणि अत्याधुनिक सुविधा पुरवण्याच्या उद्देशाने हे कार्यालय हलवण्यात आले आहे. नागरिकांनी आता खालील पत्त्यावर संपर्क साधावा:
नवीन पत्ता: ‘मॉटक्लेयर बिल्डिंग’, कार्यालय क्र. १०१-१०२, पहिला मजला, बाणेर-पाषाण लिंक रस्ता, पाषाण, पुणे.
अपॉइंटमेंट घेतलेल्या नागरिकांसाठी सूचना
ज्या नागरिकांनी ३० मार्च २०२६ किंवा त्यानंतरच्या तारखेसाठी मुंढवा केंद्राची वेळ (Appointment) आधीच आरक्षित केली आहे, त्यांना आता थेट पाषाण येथील नवीन केंद्रावर हजर राहावे लागेल. पासपोर्ट कार्यालयाने स्पष्ट केले आहे की, अपॉइंटमेंटची तारीख आणि वेळ यामध्ये कोणताही बदल झालेला नाही, केवळ पत्ता बदलला आहे. त्यामुळे नागरिकांनी दिलेल्या वेळेत नवीन केंद्रावर पोहोचणे आवश्यक आहे.
स्थलांतरामुळे वादाची ठिणगी; संमिश्र प्रतिक्रिया
या निर्णयाचे कोथरूड आणि बावधन भागातील नागरिकांनी स्वागत केले असले तरी, पूर्व पुण्यातील नागरिकांमध्ये नाराजी आहे. विमान वाहतूक तज्ज्ञ धैर्यशील वंडेकर यांनी या स्थलांतराला विरोध दर्शवला आहे. हडपसर, वाघोली आणि खराडी भागातील लोकांसाठी पाषाण हे ठिकाण अत्यंत लांब आणि प्रवासासाठी खर्चिक पडणार आहे.
