पुणे : पुणे जिल्ह्यातील जुन्नर, मंचर, शिरूर, राजगुरुनगर (खेड), चाकण यांसह इतर नगरपरिषद आणि नगरपंचायतींच्या निवडणूक निकालाची मतमोजणी थोड्याच वेळात सुरू होणार आहे. निकालाच्या दिवशी कायदा व सुव्यवस्था अबाधित राहावी यासाठी प्रशासनाने उत्तर पुणे जिल्ह्यात जमावबंदी आदेश (कलम ३७ नुसार) लागू केला आहे.
निकालाची उत्सुकता सर्व स्तरांवर शिगेला पोहोचली असून, उमेदवारांच्या समर्थकांमध्ये विजयाचा आनंद साजरा करण्याची जोरदार तयारी सुरू आहे. मात्र, गर्दीमुळे कायदा-सुव्यवस्थेला धोका निर्माण होऊ नये म्हणून प्रशासनाने खबरदारी घेतली आहे. यामुळे विजयाचा आनंद व्यक्त करता येईल, पण मोठ्या प्रमाणात जल्लोष, फटाके फोडणे किंवा रस्त्यावरून मिरवणुका काढण्यावर मात्र कडक निर्बंध घालण्यात आले आहेत.
पुणे जिल्ह्यातील या नगरपरिषदांच्या निवडणुका महायुती आणि महाविकास आघाडी यांच्यातील थेट सामना असल्याने निकालाकडे विशेष लक्ष लागले आहे. मतमोजणी सकाळी १० वाजता सुरू होईल आणि निकाल दिवसभरात हळूहळू जाहीर होत राहतील. प्रशासनाने मतमोजणी केंद्रांभोवती मोठा बंदोबस्त तैनात केला असून, नागरिकांना शांतता राखण्याचे आवाहन केले आहे.
