पुणे : पुणे येथील मुंढवा जमीन व्यवहार प्रकरणात पार्थ पवार यांच्यावर दोन दिवसांपासून आरोप होत असताना राष्ट्रवादी काँग्रेसचे ज्येष्ठ नेते शरद पवार यांनी अखेर मौन सोडले. अकोल्यातील पत्रकार परिषदेत बोलताना त्यांनी या प्रकरणाची स्वतंत्र चौकशी करण्याची मागणी केली असून, कुटुंब आणि राजकारण वेगळे असल्याचे स्पष्ट केले. विरोधकांच्या राज्य सरकारवरील आरोपांमुळे तापलेल्या वातावरणात पवारांच्या या वक्तव्याने नवे वळण मिळाले आहे.
शरद पवार म्हणाले, “कुटुंब आणि राजकारण हे माझ्यासाठी नेहमी वेगळे राहिले आहे. पार्थ पवार हे माझे नातू आहेत, पण राजकीय निर्णयांमध्ये कुटुंबाचा हस्तक्षेप होऊ नये. मुंढवा येथील ४० एकर जमिनीच्या व्यवहारात अमेडिया एंटरप्रायझेस एलएलपी कंपनीचा सहभाग असल्याचे समोर आले आहे. या प्रकरणाची मुख्यमंत्री देवेंद्र फडणवीस यांनी स्वतंत्र चौकशी करायला हवी. चौकशीतून वास्तव समोर येईल आणि दोषींवर कारवाई होईल.” ते पुढे म्हणाले, “पार्थवर गुन्हा का दाखल झाला नाही, याचे उत्तर फडणवीसच देऊ शकतात. मी कोण तेजवानी यांना ओळखत नाही आणि या व्यवहारापासून मी पूर्णपणे दूर आहे.”
सुप्रिया सुळे यांची भूमिका वैयक्तिक
या वेळी सुप्रिया सुळे यांच्या पार्थ पवारवरील समर्थनावर बोलताना पवार म्हणाले, “सुप्रिया यांनी जे म्हटले आहे, ते त्यांची वैयक्तिक भूमिका आहे. पक्षात सर्व नेत्यांचा विचार करून आणि सामूहिक निर्णय घेतले जातात. पार्थ यांनीही व्यवहार कायदेशीर असल्याचे सांगितले आहे, पण सार्वजनिक जीवनात शंका टाळण्यासाठी डील रद्द करण्यात आली आहे.”
दरम्यान, अजित पवार यांनीही आपल्या मुलाच्या व्यवहारात कोणतीही अनियमितता नसल्याचे सांगितले असून, डील रद्द झाल्याची पुष्टी केली आहे. राज्य सरकारने आधीच एका अधिकाऱ्यावर कारवाई केली असून, अतिरिक्त मुख्य सचिव विकस खरगे यांच्या अध्यक्षतेखालील समिती चौकशी करणार आहे.
