पुणे : पुणे महानगरपालिका निवडणुकीत राजकीय समीकरणे पूर्णपणे बदलली आहेत. राष्ट्रवादी काँग्रेसचे दोन्ही गट एकत्र येऊन निवडणूक लढवणार असल्याने महाविकास आघाडीत फूट पडली आहे. यामुळे काँग्रेस आणि शिवसेना (उद्धव बाळासाहेब ठाकरे) यांनी स्वतंत्र युती जाहीर केली असून, मनसेला सोबत घेण्याबाबत चर्चा सुरू आहे.
सोमवारी (२९ डिसेंबर) काँग्रेस नेते सतेज पाटील आणि शिवसेना (उबाठा) नेते सचिन अहिर यांनी युतीची अधिकृत घोषणा केली. प्राथमिक जागावाटपानुसार, एकूण १६५ जागांपैकी काँग्रेसला ६० तर ठाकरे सेनेला ४५ जागा मिळणार आहेत. उर्वरित जागांवर चर्चा सुरू असून, मनसेला ठाकरे सेनेच्या कोट्यातून काही जागा देण्याची शक्यता आहे. युती आपापल्या चिन्हावर निवडणूक लढवणार असल्याचे स्पष्ट झाले आहे.
दरम्यान, अजित पवार गट आणि शरद पवार गटाची युती पक्की झाली असून, अजित पवार गट १२५ तर शरद पवार गट ४० जागांवर लढणार आहे. दोन्ही गट आपापल्या चिन्हावर निवडणूक लढवतील. हा निर्णय स्थानिक कार्यकर्त्यांच्या आग्रहावरून घेण्यात आला असून, शरद पवार यांचा थेट हस्तक्षेप नव्हता.
१८ वर्षांनंतर पुणे पॅटर्न बदलला
– २००७ नंतर काँग्रेसला सत्तेबाहेर ठेवण्यासाठी शिवसेना-भाजप-राष्ट्रवादीचा ‘पुणे पॅटर्न’ होता.
– आता दोन्ही राष्ट्रवादी एकत्र आल्याने काँग्रेस-ठाकरे सेना-मनसे असा नवा पॅटर्न तयार झाला आहे.
– भाजप आणि शिंदे सेनेच्या युतीचा तिढा अद्याप सुटलेला नाही, त्यामुळे तिरंगी किंवा चौरंगी लढत होण्याची शक्यता.
नामांकनाचा आज शेवटचा दिवस असून, सर्व पक्षांकडून एबी फॉर्म वाटप सुरू आहे. पुणे महापालिका निवडणूक १५ जानेवारी २०२६ रोजी होणार असून, या युतीमुळे भाजपसाठी मोठे आव्हान निर्माण झाले आहे. राजकीय वर्तुळात या बदलांमुळे खळबळ उडाली आहे.
