SSC Result 2026 : राज्य माध्यमिक शिक्षण मंडळाने इयत्ता दहावीचा निकाल जाहीर केला असून यंदा एकूण ९२.०९ टक्के निकाल लागला आहे. यंदाही विद्यार्थ्यांनी घवघवीत यश संपादन केले असून अनेक ठिकाणी जल्लोषाचे वातावरण पाहायला मिळत आहे.
यंदाच्या निकालात कोकण विभागाने पुन्हा एकदा अव्वल स्थान पटकावत ९७.६२ टक्के निकालाची नोंद केली आहे. तर सर्वात कमी निकाल छत्रपती संभाजीनगर विभागाचा लागला आहे.
विशेष म्हणजे, यंदाही मुलींनी मुलांपेक्षा सरस कामगिरी करत बाजी मारली आहे. राज्यभरातील निकालात मुलींची टक्केवारी अधिक राहिली असून त्यांनी सातत्याने शैक्षणिक क्षेत्रात आपला दबदबा कायम ठेवला आहे.
याशिवाय ६४ विषयांच्या परीक्षांपैकी तब्बल २० विषयांचा निकाल १०० टक्के लागला आहे. यामुळे विद्यार्थ्यांच्या गुणवत्तापूर्ण कामगिरीचे कौतुक होत आहे.
निकाल जाहीर होताच विद्यार्थी आणि पालकांमध्ये उत्सुकता वाढली असून पुढील प्रवेशप्रक्रियेकडे सर्वांचे लक्ष लागले आहे.
