पिंपरी : पिंपरी-चिंचवड शहरात पुन्हा एकदा वाहनांची तोडफोड केल्याची घटना घडली आहे. दापोडीमधील पवारवस्ती येथे तिघांनी मिळून दोन रिक्षा आणि सहा दुचाकी अशा आठ वाहनांची तोडफोड करण्यात आली आहे. ही घटना शनिवारी (१५ फेब्रुवारी) रात्री दहा वाजता घडली. याप्रकरणी फिरोज इर्शाद शेख (वय ५७, रा. दापोडी) यांनी दापोडी पोलीस ठाण्यात फिर्याद दिली आहे. त्यानुसार नुमान अख्तर खान (वय २३), सिपटेन कय्युम खान (वय १९), मुजफ्फर सलीम कुरेशी (वय १९, तिघे रा. दापोडी) यांच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी शेख हे रिक्षा चालक असून शनिवारी रात्री त्यांनी त्यांची रिक्षा पवारवस्ती येथे घराजवळ उभी केली होती. रात्रीच्या वेळी वरील आरोपींनी शेख यांच्या रिक्षाची तोडफोड केली. त्यानंतर रवीकुमार वेणू गोपाल यांच्याही रिक्षासह परिसरातील पाच ते सहा दुचाकी वाहनांची कोयत्याने तोडफोड करून नुकसान केले. तसेच आरोपींनी कोयता हवेत फिरवून परिसरात दहशत निर्माण केली. पुढील तपास दापोडी पोलीस करीत आहेत.
