राजकीय वर्तुळातून मोठी बातमी समोर येत आहे, अखेर काँग्रेसकडून बारामती विधानसभा पोटनिवडणुकीसाठी आपला उमेदवार जाहीर करण्यात आला आहे. रविवारी काँग्रेसचे अध्यक्ष मल्लिकार्जुन खर्गे यांनी या निवडणुकीसाठी आकाश मोरे यांच्या नावावर शिक्कामोर्तब केलं आहे. अजित पवार यांच्या निधनानंतर बारामती विधानसभा मतदारसंघाची जागा रिक्त झाली होती. त्यामुळे आता या विधानसभा मतदारसंघात पोटनिवडणूक होत आहे. महायुतीकडून सुनेत्रा पवार यांना उमेदवारी देण्यात आली आहे. तर दुसरीकडे आता काँग्रेसच्या वतीने आकाश मोरे यांना निवडणुकीच्या रिंगणात उतरवण्यात आलं आहे. त्यामुळे आता या मतदारसंघात चुरशीची लढत होण्याचा अंदाज व्यक्त केला जात आहे.
दरम्यान सुरुवातीपासूनच ही निवडणूक बिनविरोध व्हावी यासाठी महायुतीकडून प्रयत्न सुरू होता. परंतु या निवडणुकीत उमेदवार देणार असल्याचं काँग्रेसकडून आधीच जाहीर करण्यात आलं होतं. या सर्व पार्श्वभूमीवर आता घडामोडींना वेग आला असून, बारामती विधानसभा पोटनिवडणुकीसाठी काँग्रेसकडून आकाश मोरे यांना उमेदवारी देण्यात आली आहे. समोर आलेल्या माहितीनुसार उद्या काँग्रेसचे प्रदेशाध्यक्ष हर्षवर्धन सपकाळ यांच्या उपस्थितीमध्ये आकाश मोरे हे आपला उमेदवारी अर्ज दाखल करण्याची शक्यता आहे.
कोण आहेत आकाश मोरे?
काँग्रेसकडून बारामती विधानसभा पोटनिवडणुकीसाठी आकाश मोरे यांना उमेदवारी जाहीर करण्यात आली आहे. आकाश मोरे हे काँग्रेसचे माजी आमदार विजय मोरे यांचे चिरंजीव आहेत. आकाश मोरे यांचे वडील विजय मोरे विधानपरिषदेवर आमदार होते. आकाश मोरे आणि त्यांचं कुटुंब काँग्रेसचे निष्ठावान समजले जातात. आकाश मोरे हे बारामती तालुक्याच्या ग्रामीण भागातील चेहरा आहे. बारामतीमध्ये धनगर समाजाचं निर्णयाक मतदान आहे, त्यामुळे काँग्रेसने यावेळी धनगर समाजाचे असलेल्या आकाश मोरे यांना निवडणुकीच्या रिंगणात उतरवलं आहे. समोर आलेल्या माहितीनुसार उद्या काँग्रेसचे प्रदेशाध्यक्ष हर्षवर्धन सपकाळ हे बारामतीच्या दौऱ्यावर असून, उद्याच आकाश मोरे हे आपला उमेदवारी अर्ज दाखल करण्याची शक्यता आहे. बारामतीमध्ये धनगर समाजाचं मतदान जास्त असल्यामुळे ही निवडणूक चुरशीची ठरण्याची शक्यता आहे.
