BRT Lane: पिंपरी-चिंचवड शहरातील बस रॅपिड ट्रान्झिट (BRT) मार्ग आता फक्त PMPL बससाठी राखीव करण्यात आला आहे. मात्र, गेल्या काही वर्षांपासून या मार्गावर कार, दुचाकी, ऑटो यांसारख्या खासगी वाहनांची घुसखोरी वाढली आहे, ज्यामुळे बीआरटी बसच्या सुरक्षेवर परिणाम होत असून अपघाताची शक्यता वाढत आहे.
सीसीटीव्ही कॅमेऱ्याद्वारे थेट कारवाई
या समस्येवर नियंत्रण आणण्यासाठी पालिकेने आणि वाहतूक पोलिसांनी अनेक वेळा दंडात्मक कारवाई केली, पण त्याचा फारसा परिणाम दिसून आलेला नाही. आता प्रत्येक बीआरटी थांब्यावर सीसीटीव्ही कॅमेरे बसवले गेले आहेत. या कॅमेर्यांमुळे कोणतेही खासगी वाहन मार्गावर शिरले, तर त्याचे थेट व्हिडिओ पुरावे मिळतील. या पुराव्याच्या आधारे वाहतूक पोलिस आणि बीआरटी विभाग संयुक्तपणे कारवाई करतील, तसेच आवश्यक असल्यास वाहन चालकाचे लायसन्स रद्द करण्याची प्रक्रियाही सुरू होईल.
बीआरटी मार्गांची माहिती
पिंपरी-चिंचवडमध्ये एकूण 5 बीआरटी मार्ग आहेत, ज्यांची लांबी सुमारे 52 किलोमीटर असून 52 बीआरटी थांबे आहेत. या मार्गांमध्ये निगडी ते दापोडी, सांगवी फाटा ते किवळे, नाशिक फाटा ते वाकड, चिखली ते जगताप डेअरी स्पाइन रोड, मॅगझीन चौक ते देहू-आळंदी फाटा यांचा समावेश आहे. या मार्गांवरून रोज हजारो प्रवासी बसने प्रवास करतात, मात्र खासगी वाहनांची घुसखोरीमुळे बसला विलंब होतो. तसेच अपघात होण्याची शक्यता वाढते.
हेही वाचा – Pune Traffic: आता पुणेकरांची वाहतूक कोंडीतून होणार सुटका; AI आधारीत प्रकल्पामुळे सुटणार ट्राफिक जामची समस्या
दरम्यान, नगरपालिका आणि आरटीओ एकत्रितपणे ही कठोर मोहीम राबवत आहेत. प्रशासनाने स्पष्ट केले आहे की बीआरटी मार्ग हे फक्त सार्वजनिक बससाठी आहे, त्यामुळे नियम मोडणाऱ्या खासगी वाहन चालकांवर थेट कारवाई होईल. शहरातील लाखो प्रवाशांच्या सोयीसाठी उभारलेल्या या वाहतूक व्यवस्थेची सुरक्षा सुनिश्चित करण्यासाठी प्रशासन पूर्णपणे सज्ज आहे.
