Ashok Kharat Case: नाशिक: स्वतःला ‘सिद्ध पुरुष’ म्हणवून घेत महिलांचे लैंगिक शोषण करणाऱ्या भोंदूबाबा अशोक खरात उर्फ ‘कॅप्टन’ याच्या अडचणीत मोठी वाढ झाली आहे. नाशिक न्यायालयाने दोन्ही बाजूंचा युक्तिवाद ऐकून घेतल्यानंतर खरातच्या पोलीस कोठडीत 29 मार्चपर्यंत वाढ करण्याचा महत्त्वपूर्ण निर्णय दिला आहे. तपासादरम्यान समोर आलेले धक्कादायक पुरावे आणि पीडित महिलांच्या वाढत्या तक्रारींमुळे या प्रकरणाचे गांभीर्य अधिकच वाढले असून, पोलीस आता अघोरी कृत्यांच्या दिशेने तपास करत आहेत.
न्यायालयीन सुनावणीत सरकारी वकिलांचे खळबळजनक दावे
सुनावणीदरम्यान सरकारी वकिलांनी न्यायालयात खरातच्या काळ्या कृत्यांचा पाढाच वाचला. तपासातून समोर आलेल्या माहितीनुसार, खरात त्याच्याकडे येणाऱ्या महिलांना ‘विशेष प्रकारचे पाणी’ आणि पेढा देऊन गुंगी आणत असे किंवा त्यांना संमोहित करून अत्याचार करत असे. सर्वात धक्कादायक बाब म्हणजे, खरातच्या फार्महाऊसवर पिस्तुलाच्या 5 रिकाम्या पुंगळ्या सापडल्या असून, त्याने नरबळी दिल्याचा दाट संशय सरकारी वकिलांनी व्यक्त केला आहे. या दाव्यामुळे संपूर्ण नाशिक जिल्ह्यात खळबळ उडाली आहे.
वन्यजीव कायद्याचे उल्लंघन आणि मोठी जप्ती
भोंदूबाबा खरात लोकांना घाबरवण्यासाठी वाघ आणि सापांचा वापर करत असल्याचे तपासात उघड झाले आहे. तसेच, त्याच्याकडे बेकायदेशीरपणे हरणाची ‘कस्तुरी’ सापडल्याने त्याच्यावर वन्यजीव संरक्षण कायद्यांतर्गतही कारवाईची टांगती तलवार आहे. पोलिसांनी त्याच्याकडून 6 लाख 53 हजारांची रोकड आणि लॅपटॉप जप्त केला असून, त्यातील डिजिटल पुराव्यांची सखोल तपासणी सुरू आहे.
तक्रारदारांचा आकडा वाढला; ६ गुन्हे दाखल
सुरुवातीला एका पीडितेने धाडस दाखवून नाशिकच्या सरकारवाडा पोलीस ठाण्यात तक्रार दिल्यानंतर खरातला बेड्या ठोकण्यात आल्या होत्या. मात्र, आता पोलिसांच्या आवाहनानंतर अनेक महिला पुढे येत आहेत. सोमवार सायंकाळपर्यंत त्याच्यावर एकूण 6 गुन्हे दाखल झाले असून, लग्नाआधी आणि नंतर महिलांचे शोषण केल्याचे गंभीर आरोप त्याच्यावर आहेत. पीडितांची संख्या आणखी वाढण्याची शक्यता पोलिसांनी वर्तवली आहे.
अघोरी विधी आणि ‘सिद्धपूजे’चे रहस्य
ईशानेश्वर मंदिरातील ‘सिद्धपूजा’ नक्की काय होती आणि खरात कोणकोणते अघोरी विधी करायचा, याचा छडा लावणे पोलिसांसाठी महत्त्वाचे आहे. या गुन्ह्यात त्याचे आणखी कोण साथीदार आहेत आणि त्याने कोणाकोणाची फसवणूक केली आहे, हे शोधण्यासाठी पोलिसांनी सात दिवसांच्या कोठडीची मागणी केली होती. न्यायालयाने परिस्थितीचे गांभीर्य ओळखून 29 मार्चपर्यंत कोठडी मंजूर केली असून, आता पोलीस या प्रकरणाच्या मुळापर्यंत जाण्याचा प्रयत्न करत आहेत.
