Ahilyanagar Municipal Corporation: महानगरपालिकेच्या अर्थसंकल्पीय सभेत शुक्रवारी प्रचंड गदारोळ पाहायला मिळाला. छत्रपती शिवाजी महाराजांबद्दल केलेल्या वादग्रस्त विधानामुळे कायम चर्चेत राहिलेला अपक्ष नगरसेवक श्रीपाद छिंदम याने सभागृहात बोलण्याचा प्रयत्न करताच, इतर सर्वपक्षीय नगरसेवक आक्रमक झाले. “महापुरुषांचा अपमान करणाऱ्याला बोलू देणार नाही,” असा आक्रमक पवित्रा घेत नगरसेवकांनी छिंदमला अक्षरशः सभागृहाबाहेर काढले.
कागदपत्रे भिरकावली, माईक खेचला!
सभागृहात अर्थसंकल्पावर चर्चा सुरू असताना छिंदमने प्रश्न मांडण्यासाठी उभं राहताच गोंधळाला सुरुवात झाली. संतप्त नगरसेवकांनी केवळ आक्षेपच घेतला नाही, तर छिंदमसमोर असलेले अर्थसंकल्पाचे कागद फाडून फेकून दिले आणि त्याचा माईकही बाजूला सारला. या अनपेक्षित प्रकारामुळे सभागृहातील वातावरण कमालीचे तापले होते. तणाव वाढल्याने अखेर छिंदमला बाहेर जावे लागले.
‘माझ्या जीविताला धोका’; छिंदमचा गंभीर आरोप
सभागृहातून बाहेर पडल्यानंतर श्रीपाद छिंदमने थेट अप्पर पोलीस अधीक्षकांची भेट घेतली. माध्यमांशी बोलताना त्याने सत्ताधारी राष्ट्रवादी काँग्रेस आणि स्थानिक आमदारांवर निशाणा साधला. “माझ्यावर सभागृहात हल्ला करण्याचा प्रयत्न झाला. जर माझ्या जीविताला काही झाले, तर त्याला आमदार संग्राम जगताप आणि त्यांचे नगरसेवक जबाबदार असतील,” असा खळबळजनक आरोप छिंदमने केला आहे.
नगरसेवकांचा ‘नो एन्ट्री’चा पवित्रा
दुसरीकडे, राष्ट्रवादीच्या गटनेत्यांसह इतर नगरसेवकांनी आपली भूमिका स्पष्ट केली आहे. “ज्या व्यक्तीने आराध्य दैवताचा अपमान केला, त्याला लोकशाहीच्या मंदिरात बोलण्याचा नैतिक अधिकार नाही,” असे सांगत त्यांनी छिंदमच्या सहभागाला विरोध दर्शवला. इतकेच नव्हे तर, महापुरुषांचा अपमान करणाऱ्यांना निवडणूक लढवण्यास कायमची बंदी घालावी, असा कायदा करण्याची मागणीही नगरसेवकांनी केली आहे.
