Ashok Kharat case: अंधश्रद्धेचा गैरफायदा घेऊन महिलांचे लैंगिक शोषण केल्याचा गंभीर आरोप असलेल्या भोंदूबाबा अशोक खरात याच्या अडचणीत प्रचंड वाढ झाली आहे. संपूर्ण महाराष्ट्राला हादरवून सोडणाऱ्या या बहुचर्चित प्रकरणाच्या कायदेशीर लढाईत आता देशातील अग्रगण्य कायदेतज्ज्ञ आणि ज्येष्ठ सरकारी वकील उज्ज्वल निकम यांची अधिकृतपणे एन्ट्री झाली आहे. राज्य सरकारने खरातविरुद्धची बाजू भक्कम करण्यासाठी त्यांच्या सोबतीला अहिल्यानगरचे प्रसिद्ध फौजदारी वकील परिमल फळे यांची सहायक विशेष सरकारी वकील म्हणून नियुक्ती केली आहे.
विधी व न्याय विभागाकडून अधिसूचना जारी
गृह खात्याने या संवेदनशील खटल्याची गांभीर्याने दखल घेत आरोपीला कठोर शिक्षा व्हावी, यासाठी कायदेशीर पावले उचलली आहेत. राज्य सरकारच्या विधी व न्याय विभागाचे कक्ष अधिकारी राजेश मांजरेकर यांच्या स्वाक्षरीने गुरुवारी (११ जून) या विशेष नियुक्तीची अधिकृत अधिसूचना प्रसिद्ध करण्यात आली. या निर्णयामुळे सरकारी पक्षाची बाजू न्यायालयात अत्यंत प्रभावी आणि आक्रमकपणे मांडली जाणार असून, या हाय-प्रोफाईल खटल्याकडे संपूर्ण राज्याचे लक्ष वेधले गेले आहे.
‘निकम-फळे’ जोडीचा दांडगा अनुभव
अशोक खरातला कायदेशीर कोंडीत पकडण्यासाठी नियुक्त करण्यात आलेली ही जोडी फौजदारी खटल्यांमधील त्यांच्या उत्कृष्ट कामगिरीसाठी ओळखली जाते. वकील परिमल फळे यांनी यापूर्वीही अनेक महत्त्वाच्या आणि गुंतागुंतीच्या प्रकरणांमध्ये उज्ज्वल निकम यांच्यासोबत काम केले आहे. राहुरीचे आढाव वकील दाम्पत्य हत्या प्रकरण आणि नेवाशातील वकील रियाज पठाण खून खटल्यात या जोडीने सरकारची बाजू समर्थपणे सांभाळली होती. याशिवाय रेखा जरे हत्याकांड आणि संदीप वारळ हत्या प्रकरणासारख्या राज्या गाजलेल्या गुन्ह्यांच्या तपासात आणि न्यायालयीन प्रक्रियेत फळे यांनी महत्त्वपूर्ण कामगिरी बजावली आहे.
आरोपी सध्या गजाआड; संपत्तीचीही होणार चौकशी?
भोंदूगिरीच्या नावाखाली वासनेचा बाजार मांडणारा संशयित अशोक खरात सध्या पोलिसांच्या कोठडीत आहे. त्याने अंधश्रद्धेच्या जाळ्यात ओढून किती महिलांची फसवणूक केली, हे कृत्य तो कधीपासून करत होता आणि यादरम्यान त्याने किती बेकायदेशीर संपत्ती जमा केली, याचा सखोल तपास आगामी काळात समोर येण्याची शक्यता आहे. या तगड्या कायदेशीर नियुक्तीमुळे आता न्यायालयीन सुनावणीदरम्यान दोन्ही पक्षांकडून होणारा युक्तिवाद आणि कोर्टातील घडामोडी अत्यंत चुरशीच्या ठरणार आहेत.
