Baramati Bypoll: राज्याचे दिवंगत उपमुख्यमंत्री अजित पवार यांच्या निधनामुळे रिक्त झालेल्या बारामती विधानसभा मतदारसंघाच्या पोटनिवडणुकीसाठी राजकीय हालचालींना वेग आला आहे. अर्ज भरण्याच्या पहिल्याच दिवशी बारामतीत एक आगळीवेगळी परिस्थिती पाहायला मिळाली. स्थानिक पातळीवरून एकाही उमेदवाराने अद्याप अर्ज दाखल केला नसला, तरी चक्क मतदारसंघाबाहेरील ३ इच्छुकांनी आपली उमेदवारी नोंदवून सर्वांचे लक्ष वेधून घेतले आहे.
निवडणूक कार्यक्रम आणि पार्श्वभूमी
निवडणूक आयोगाने जाहीर केल्यानुसार, बारामती आणि राहुरी या दोन विधानसभा जागांसाठी २३ एप्रिल २०२६ रोजी मतदान प्रक्रिया पार पडणार आहे, तर ४ मे २०२६ रोजी या निवडणुकीचा निकाल स्पष्ट होईल. या पार्श्वभूमीवर राजकीय वातावरण तापू लागले आहे.
कोणी दाखल केले अर्ज?
पहिल्या दिवशी उमेदवारी अर्ज दाखल करणाऱ्यांमध्ये बारामती बाहेरील खालील नावांचा समावेश आहे:
- सतीश कृष्णा कदम: जत (सांगली) – हिंदुस्तान जनता पार्टी.
- सागर शरद भिसे: सातारा – अपक्ष.
- राघू घुटुकडे: सांगोला (सोलापूर) – न्यू राष्ट्रीय समाज पार्टी.
या ‘बाहेरच्या’ एण्ट्रीमुळे बारामतीच्या पारंपरिक राजकारणात नव्या समीकरणांची चर्चा सुरू झाली आहे.
राजकीय चुरस वाढणार: मुख्य लढत कोणामध्ये?
अजित पवार यांच्या निधनानंतर ही जागा राखण्यासाठी राष्ट्रवादीकडून राज्याच्या उपमुख्यमंत्री सुनेत्रा पवार यांची उमेदवारी निश्चित मानली जात आहे. काँग्रेसने देखील ही निवडणूक लढवण्याचे संकेत दिले असून जिल्हा कमिटीने तसा ठरावही मंजूर केला आहे. यामुळे महाविकास आघाडीत ही जागा कोणाकडे जाणार, याकडे सर्वांचे लक्ष आहे. ओबीसी नेते लक्ष्मण हाके देखील निवडणूक रिंगणात उतरण्याची शक्यता असल्याने ही लढत अधिक रंगतदार होण्याची चिन्हे आहेत. स्थानिक उमेदवारांनी अद्याप वेट अँड वॉचची भूमिका घेतली असली, तरी प्रमुख पक्षांचे अधिकृत चेहरे समोर आल्यानंतर बारामतीचे रणमैदान पूर्णपणे तापणार आहे. अर्ज माघारी घेण्याच्या शेवटच्या दिवसापर्यंत रिंगणात नेमके किती आणि कोण उमेदवार उरतात, हे पाहणे महत्त्वाचे ठरेल.
