Buldhana Accident : बुलढाणा जिल्ह्यात एक भीषण अपघाताची घटना घडली आहे. देऊळगाव राजा तालुक्यात जाफराबाद-जालना महामार्गावर आज सकाळी कापूस वेचणीला जाणाऱ्या महिला मजुरांना घेऊन जाणाऱ्या मालवाहू पिकअप वाहनाला मागून भरधाव एसटी बसने जोरदार धडक दिली. या भीषण अपघातात दोन महिला मजुरांचा जागीच मृत्यू झाला, तर पाच महिला गंभीर जखमी झाल्या.
मायाबाई सुरज काजळे (वय ३२), रा. रामखेडा, ता. खगनार, जि. बुरहानपूर (मध्य प्रदेश), रिचाबाई काल्या कासदेकर (वय ७२), रा. नांदुरी, ता. धारणी, जि. अमरावती अशी मृत महिला मजुरांची नावे आहेत.
या महिला मजूर कापूस हंगामात काम करण्यासाठी देऊळगाव राजा परिसरात आल्या होत्या. रोजच्या सवयीप्रमाणे त्या पिंपळगाव राजा येथील कापूस शेतात वेचणीला जात होत्या. सकाळी पिकअपमध्ये चढत असतानाच हा अपघात घडला.
अपघातानंतर जखमींना तात्काळ देऊळगाव राजा ग्रामीण रुग्णालयात दाखल करण्यात आले. प्राथमिक उपचारांनंतर पाचही गंभीर जखमी महिलांना पुढील उपचारासाठी जालना येथील शासकीय वैद्यकीय महाविद्यालय व रुग्णालयात (घाटी) हलवण्यात आले आहे. त्यांची प्रकृती चिंताजनक आहे.
अपघातानंतर एसटी बसचालक घटनास्थळावरून फरार झाला आहे. देऊळगाव राजा पोलीस ठाण्यात गुन्हा दाखल करण्यात आला असून पुढील तपास सुरू आहे. मृत महिलांच्या कुटुंबावर दुःखाचा डोंगर कोसळला आहे.
