Kolhapur News: कोल्हापूर जिल्ह्यातील उजळाईवाडी परिसरात शुक्रवारी दुपारी घडलेल्या एका हृदयद्रावक दुर्घटनेने संपूर्ण परिसरात शोककळा पसरली. शाळेला सुट्टी असल्याने घराबाहेर खेळायला गेलेल्या एका 13 वर्षीय मुलाचा क्रिकेट खेळताना झालेल्या अपघातात मृत्यू झाला. मयत बालकाचे नाव अफान असिफ बागवान असे असून, या अचानक घडलेल्या प्रसंगाने परिसरातील नागरिकांत खळबळ उडाली आहे.
विजेच्या धक्क्याने जागीच मृत्यू
अफान आणि त्याचे मित्र मैदानात खेळत असताना क्रिकेटचा चेंडू जवळच्या हनुमंत खांडेकर यांच्या इमारतीच्या छतावर गेला. बॉल आणण्यासाठी अफान टेरेसवर चढला. मात्र त्या इमारतीच्या अत्यंत जवळून 11,000 व्होल्ट उच्चदाब विद्युत वाहिनी जात होती. फक्त दीड-दोन फूट अंतरावरून जाणाऱ्या या लाइनचा स्पर्श होताच अफानला जोराचा विद्युत धक्का बसला. धक्का एवढा तीव्र होता की त्याचा जागीच मृत्यू झाला. या प्रकारानंतर परिसरात संतापाची लाट उसळली असून सुरक्षा व्यवस्थेबाबत अनेक प्रश्न उपस्थित होऊ लागले आहेत.
हेही वाचा – Pandharpur News : बाळाला जन्म दिला, नंतर त्रास वाढला; एका चुकीमुळे २२ वर्षीय महिलेचा मृत्यू, नेमकं काय घडलं?
कोल्हापूर-गारगोटी रस्त्यावर अपघात
दरम्यान, कोल्हापूरमध्येच आणखी एक गंभीर घटना घडली. कोल्हापूर-गारगोटी मार्गावरील चुये फाटा परिसरात व्हॅन आणि दुचाकीची समोरासमोर भीषण धडक झाली. या अपघातात शिवाजी शंकर कोळी (45, रा. कागल) आणि व्हॅन चालक अतुल अरविंद पाटील (30, रा. गुडाळ, ता. राधानगरी) यांचा मृत्यू झाला. धडकेत व्हॅनमधील गजानन प्रभाकर चौगले, अनिल शिवाजी जाधव, तसेच दुचाकीवरील वैशाली शिवाजी कोळी आणि त्यांची नात सुप्रिया चेतन दळवी (वय 3) हे जखमी झाले असून त्यांच्यावर उपचार सुरू आहेत.
