कोल्हापूर: छत्रपती शिवाजी महाराजांचा अपमान करणाऱ्या तसेच इतिहास अभ्यासक इंद्रजीत सावंत यांना धमकी देणाऱ्या प्रशांत कोरटकरला तेलंगणातून अटक करण्यात आली आहे. याबाबत गृहविभागातील सूत्रांनी माहिती दिली आहे. प्रशांत कोरटकरने कोल्हापूर जिल्हा सत्र न्यायालयात अटकपूर्व जामिनासाठी अर्ज केला होता. परंतु, न्यायालयाने तो फेटाळला आहे.
कोल्हापूरमधील इतिहास अभ्यासक इंद्रजीत सावंत यांना धमकी दिल्यानंतर प्रशांत कोरटकर हा 25 फेब्रुवारीपासून फरार होता. कोरटकरने छत्रपती शिवाजी महाराज आणि छत्रपती संभाजी महाराज यांच्याबाबत देखील आक्षेपार्ह विधान केले होते. तो नागपुरातून फरार होऊन चंद्रपूरमध्ये लपून बसला होता. त्यानुसार त्याला अटक करण्यासाठी कोल्हापूर पोलिस गेले असता त्या ठिकाणाहून देखील तो फरार झाला होता.
एका महिन्यानंतर प्रशांत कोरटकरला तेलंगणामधून अटक केली आहे. त्या ठिकाणी नोंद केल्यानंतर कोल्हापूर पोलिस त्याला आपल्या ताब्यात घेणार आहेत. इतिहास अभ्यास इंद्रजीत सावंत यांनी कोरटकर विरोधात कोल्हापुरातील जुना राजवाडा पोलिस ठाण्यात तक्रार नोंद केली होती. त्यानुसार प्रशांत कोरटकरला आता कोल्हापूरला आणण्यात येणार आहे.
दरम्यान प्रशांत कोरटकरचा अंतरिम जामीन उच्च न्यायालय देखील फेटाळणार असल्याची जाणीव झाल्यानंतर कोणताही पर्याय त्याच्यासमोर शिल्लक राहिला नाही. त्यामुळे कोरटकरला पोलिसांसमोर शरण येण्याशिवाय दुसरा पर्याय नव्हता .
