Sunetra Pawar : महाराष्ट्राच्या राजकारणात आज एक मोठी उलथापालथ होत असून, सुनेत्रा पवार राज्याच्या पहिल्या महिला उपमुख्यमंत्री म्हणून शपथ घेणार आहेत. अजित पवार यांच्या निधनानंतर रिकामी झालेली सत्ताकेंद्राची धुरा आता सुनेत्रा पवार यांच्या खांद्यावर सोपवण्यात आली आहे. या शपथविधीसोबतच त्यांच्याकडे कोणत्या खात्यांची जबाबदारी असेल, याबाबतची महत्त्वाची माहिती समोर आली आहे.
अर्थ खात्याबाबत अद्याप निर्णय नाही
अजित पवार यांच्याकडे उपमुख्यमंत्री पदासह अर्थ आणि नियोजन, राज्य उत्पादन शुल्क व क्रीडा अशी महत्त्वाची खाती होती. सूत्रांच्या माहितीनुसार, सुनेत्रा पवार यांच्याकडे सध्या राज्य उत्पादन शुल्क आणि क्रीडा विभाग ही खाती सोपवली जाणार आहेत. मात्र, अर्थ खात्याची जबाबदारी सध्या त्यांच्याकडे दिली जाणार नाही. अर्थसंकल्पीय अधिवेशन पार पडल्यानंतर या खात्याबाबत पुनर्विचार होऊन ही जबाबदारी पुन्हा सुनेत्रा पवारांकडे जाण्याची शक्यता आहे.
आजचा कार्यक्रम आणि प्रक्रिया
दरम्यान, आज दुपारी २ वाजता विधानभवनात राष्ट्रवादी काँग्रेस (अजित पवार गट) विधिमंडळ पक्षाची बैठक होईल. यात सुनेत्रा पवार यांची ‘विधिमंडळ गटनेते’ म्हणून अधिकृत निवड केली जाईल. तथापी, संध्याकाळी ५ वाजता राजभवनावर सुनेत्रा पवार यांचा उपमुख्यमंत्रिपदाचा शपथविधी संपन्न होईल. आज केवळ त्यांचाच शपथविधी होणार असल्याचे स्पष्ट झाले आहे. उपमुख्यमंत्री पदाची शपथ घेतल्यानंतर नियमानुसार सुनेत्रा पवार यांना त्यांच्या राज्यसभा सदस्यत्वाचा राजीनामा द्यावा लागेल.
शरद पवारांची तटस्थ भूमिका
सुनेत्रा पवारांच्या या राजकीय प्रवासावर शरद पवार यांनी अत्यंत मोजक्या शब्दांत प्रतिक्रिया दिली आहे. ते म्हणाले की, पक्षाची धुरा सांभाळण्यासाठी कोणीतरी पुढे येणे आवश्यक होते आणि तो निर्णय त्यांच्या पक्षाचा आहे. आमचे राजकीय मार्ग वेगळे असले तरी कौटुंबिक नाते जपले जाईल. प्रफुल्ल पटेल आणि सुनील तटकरे यांनी घेतलेल्या या निर्णयावर आपण भाष्य करणार नसल्याचेही त्यांनी स्पष्ट केले.
