जयपूर: राजस्थानच्या सिकर जिल्ह्यातील एका शाळेत चौथीच्या विद्यार्थिनीने वर्गात दुपारी जेवणाचा डबा उघडला आणि ती जागीच कोसळली. शिक्षकांनी धावपळ करून तिला रुग्णालयात हलवले, पण तिचा आधीच मृत्यू झाला होता. या मुलीला तासाभरातच हृदयविकाराचे दोन धक्के बसले होते, असे डॉक्टरांनी सांगितले.
प्राची कुमावत (९) असे या मुलीचे नाव आहे. तिला आधी या प्रकारचा त्रास कधी झाला नव्हता. त्यामुळे कोवळ्या वयातील विद्यार्थ्यांच्या आरोग्याचा प्रश्न ऐरणीवर आला आहे. सिकर जिल्ह्यातील दांता येथील आदर्श विद्या मंदिर शाळेत ही मुलगी शिकत होती. या शाळेचे मुख्याध्यापक नंदकिशोर यांनी बुधवारी दिलेल्या माहितीनुसार, ही घटना मंगळवारी सकाळी ११ वाजण्याच्या सुमारास घडली. या मुलीने वर्गात असताना जेवणाचा डबा उघडला आणि ती जागीच कोसळली. याप्रकारे याप्रकारे मुलांना मूर्च्छा येण्याचे प्रकार नवे नाहीत. पण थोडेसे पाणी दिले की अशी मुले सावध होतात.
शिक्षकांनी आधी या मुलीला नजीकच्या दांता कम्युनिटी हेल्थ सेंटरमध्ये नेले. तेथे या मुलीला थोडे बरे वाटू लागले. नंतर तेथील डॉक्टरांनी तिला रुग्णवाहिकेतून सिकरमधील सरकारी रुग्णालयात पाठवण्याचा निर्णय घेतला. तेवढ्यात तिला पुन्हा हृदयविकाराचा धक्का बसला. सिकरमधील सरकारी रुग्णालयात पोहोचण्याच्या आधीच तिचा मृत्यू झाला. दांता सीएचसीचे डॉ. रा. के. जांगीड यांनी सांगितले की, या मुलीवर आम्ही ऑक्सिजनसह कार्डियाक रेस्सायटेशनचे उपचार केले होते. प्राथमिक अंदाजानुसार, तिला हृदयविकाराचे धक्के बसले असावेत. या मुलीचे वडील खासगी नोकरी करतात, असे वृत्त स्थानिक माध्यमांनी दिले आहे.
