ISRO Mission Failed: भारतीय अंतराळ संशोधन संस्थेच्या (ISRO) 2026 या वर्षातील पहिल्याच महत्त्वाकांक्षी मोहिमेला तांत्रिक अडचणींचा सामना करावा लागला आहे. सोमवारी, 12 जानेवारी रोजी श्रीहरिकोटा येथील सतीश धवन अंतराळ केंद्रावरून सकाळी 10:17 वाजता प्रक्षेपित करण्यात आलेली PSLV C62/EOS-N1 (अन्वेषा) मोहीम तिसऱ्या टप्प्यातील शेवटच्या क्षणी आलेल्या तांत्रिक बिघाडामुळे अयशस्वी ठरली. या मोहिमेद्वारे भारताचा प्रगत पृथ्वी निरीक्षण उपग्रह EOS-N1 आणि इतर 14 परदेशी व देशांतर्गत पेलोड्स अवकाशात सोडले जाणार होते.
तिसऱ्या टप्प्याच्या अंतिम प्रक्रियेत तांत्रिक बिघाड
सकाळी प्रक्षेपणासाठी सर्व तांत्रिक निकष (Parameters) योग्य असल्याचे स्पष्ट झाल्यानंतर स्वयंचलित क्रम जारी करण्यात आला आणि 10:18:30 वाजता रॉकेटने अवकाशात झेप घेतली. सुरुवातीचे टप्पे यशस्वीरित्या पार पडले होते. मात्र रॉकेटच्या तिसऱ्या टप्प्याच्या अंतिम प्रक्रियेत तांत्रिक बिघाड झाला आणि ही मोहीम अपयशी ठरली. विशेष म्हणजे, 2025 मधील एका अपयशानंतर PSLV साठी हे महत्त्वाचे पुनरागमन मानले जात होते, परंतु या तांत्रिक अडथळ्यामुळे इस्रोच्या प्रयत्नांना यश आले नाही.
EOS-N1 ‘अन्वेषा’चे महत्त्व
या मोहिमेतील मुख्य उपग्रह DRDO चा EOS-N1 (अन्वेषा) हा हायपरस्पेक्ट्रल अर्थ ऑब्झर्वेशन उपग्रह होता. सीमा भागातील देखरेख करणे, शत्रूची लपलेली लक्ष्ये शोधणे आणि पर्यावरणीय बदलांवर लक्ष ठेवणे या कामात हा उपग्रह क्रांती घडवेल, अशी अपेक्षा होती. यासोबतच इस्रोची व्यावसायिक शाखा ‘न्यूस्पेस इंडिया लिमिटेड’ (NSIL) द्वारे इतर 14 सह-प्रवासी उपग्रह देखील पाठवण्यात आले होते. या मोहिमेच्या अपयशामुळे संरक्षण आणि संशोधन क्षेत्रातील या महत्त्वाच्या डेटा मिळवण्याच्या प्रक्रियेला तूर्तास ब्रेक लागला आहे.
