Naxal Commander Hidma Killed : आंध्र प्रदेशातील अल्लुरी सीताराम राजू जिल्ह्यातील मारेदुमिल्ली जंगलात आज सकाळी (१८ नोव्हेंबर) सुरक्षा दल आणि नक्षलवाद्यांमध्ये जोरदार चकमक झाली. या चकमकीत सहा नक्षलवादी ठार झाले असून, त्यापैकी एक म्हणजे बस्तरचा सर्वात कुख्यात नक्षल कमांडर माडवी हिडमा (वय ५१) आणि त्याची पत्नी राजे (उर्फ राजक्का) यांचा समावेश असल्याचे वृत्त आहे.
ही घटना आंध्र प्रदेश, छत्तीसगड आणि तेलंगणाच्या त्रिकोणी सीमेवर घडली, जिथे नक्षलवादी वर्षानुवर्षे सक्रिय असतात. आंध्र प्रदेश पोलिसांचे ग्रेहाउंड कमांडो आणि छत्तीसगड पोलिसांच्या संयुक्त शोध मोहिमेत ही यशस्वीता मिळाली असून, डीजीपी हरीश कुमार गुप्ता यांनी घटनेची पुष्टी केली आहे. सकाळी ६ ते ७ वाजेदरम्यान झालेल्या या गोळीबारात दोन्ही बाजूंनी अनेक गोळ्या झाडल्या गेल्या, तर सुरक्षा दलांना कोणतीही हानी झाली नाही.
सुरक्षा दलांना मिळालेल्या गुप्त माहितीच्या आधारे गेल्या काही दिवसांपासून सीमेवर तीव्र शोध मोहीम सुरू होती. नक्षलवादी छत्तीसगडमधून आंध्रकडे पळ काढत असल्याचे निदर्शनास आल्यानंतर ही कारवाई तीव्र झाली. चकमकीनंतर जंगलात सर्च ऑपरेशन सुरू असून, आणखी नक्षलवादी असण्याची शक्यता आहे. ठार झालेल्या नक्षलवाद्यांपासून शस्त्रे, स्फोटके आणि दस्तऐवज जप्त करण्यात आले आहेत.
२६ हल्ल्यांचा मास्टरमाइंड
माडवी हिडमा हा सीपीआयच्या दंडकारण्य स्पेशल झोनल कमिटीचा प्रमुख होता आणि नुकतेच सेंट्रल कमिटी मेंबर म्हणून पदोन्नती झाली होती. १९८१ मध्ये छत्तीसगडच्या सुकमा जिल्ह्यात जन्मलेला हिडमा बालपणीपासूनच नक्षलवादी संघटनेत सामील झाला होता. तो नक्षलवाद्यांमधील सर्वात तरुण आणि धाकधक्की करणारा नेते म्हणून ओळखला जायचा. त्याच्यावर १ कोटी रुपयांचा इनाम होता आणि राष्ट्रीय तपास संस्थेच्या मोस्ट वॉन्टेड यादीत त्याचे नाव होते.
हिडमाने बस्तर आणि दंडकारण्य भागात २६ हून अधिक घातक हल्ले आखले होते, ज्यात २०१३ च्या झिरम घाटी हल्ल्यात २७ जण आणि २०२१ च्या सुकमा हल्ल्यात २२ जवान मारले गेले होते. त्याने १५५ हून अधिक जवानांच्या जीवाची हानी केली होती. नुकत्याच झालेल्या छत्तीसगड गृहमंत्र्यांच्या मध्यस्थीने त्याच्या आईने हिडमाला शरणागती पत्करण्याची विनंती केली होती, पण तो ऐकला नाही.
