मुंबई : भारत आणि अमेरिका यांच्यातील व्यापारी संबंधांना नवं बळ मिळण्याची शक्यता आहे. अमेरिकेने भारतावर लादलेल्या मोठ्या आयात शुल्कानंतर आता दोन्ही देशांमध्ये व्यापारी संबंध सुधारण्यासाठी पावलं उचलली जात आहेत. माजी राष्ट्राध्यक्ष डोनाल्ड ट्रम्प यांनी पंतप्रधान नरेंद्र मोदी यांचे कौतुक केल्यानंतर आणि मोदींच्या सकारात्मक प्रतिसादामुळे व्यापार कराराच्या चर्चेला गती मिळाली आहे.
काल 15 सप्टेंबर रोजी, अमेरिकेची विशेष व्यापार चर्चा टीम भारतात दाखल झाली आहे. आज, 16 सप्टेंबर रोजी, उच्चस्तरीय बैठकीत दोन्ही देश प्रलंबित व्यापारी मुद्द्यांवर चर्चा करतील. परराष्ट्र मंत्रालयाचाही या चर्चेत सहभाग असेल, कारण काही मुद्दे राजनैतिक स्वरूपाचे आहेत. याशिवाय, भारत युरोपियन युनियनशीही उच्चस्तरीय संवाद साधत आहे.
IPEF फ्रेमवर्कवर विशेष लक्ष
या बैठकीत इंडो-पॅसिफिक इकॉनॉमिक फ्रेमवर्क फॉर प्रॉस्पेरिटी (IPEF) अंतर्गत आर्थिक सहकार्य, उत्पादने आणि व्यापार यावर सविस्तर चर्चा होईल. यामुळे दोन्ही देशांमधील व्यापारी संबंध अधिक दृढ होण्याची अपेक्षा आहे.
MSME आणि निर्यातीला चालना
भारत सरकार “एक्सपोर्ट प्रमोशन मिशन” अंतर्गत सूक्ष्म, लघु आणि मध्यम उद्योगांना (MSME) प्रोत्साहन देण्यासाठी प्रयत्नशील आहे. केंद्रीय अर्थसंकल्प 2025-26 मध्ये याची घोषणा झाली असून, पुढील सहा वर्षांत निर्यातीला मोठ्या प्रमाणात चालना देण्याचा आणि छोट्या उद्योजकांना मदत करण्याचा सरकारचा मानस आहे.
एक्सपोर्ट मिशनसाठी वाढीव निधी
सूत्रांनुसार, या मिशनसाठी सध्याच्या 2,250 कोटी रुपयांपेक्षा अधिक निधी देण्याचा विचार सुरू आहे. हा मिशन पाच वर्षांसाठी राबवला जाईल. मंत्रालयाने यासंदर्भातील सर्व तयारी पूर्ण केली असून, लवकरच मंत्रिमंडळाची मंजुरी मिळण्याची शक्यता आहे.
