नोएडा: उत्तर प्रदेशातील नोएडा येथील एका व्यावसायिकाने त्याच्या पत्नीवर पाकिस्तानी गुप्तहेर असल्याचा आरोप केला आहे. त्याची पत्नी अनेक वेळा पाकिस्तान आणि चीनला गेली. तसेच लग्नानंतर अवघ्या तीन महिन्यांनी ती गायब झाली आणि तो अजूनही तिचा शोध घेत आहेत. परंतु, त्याच्या पत्नीचा कोणताही पत्ता लागलेला नाही. आता त्याने या प्रकरणात पोलिसांकडून चौकशीची मागणी केली आहे.
नोएडाच्या सेक्टर १०५ मधील जज कॉलनीमध्ये राहणारे व्यापारी लोकेश राठी यांनी त्यांच्या पत्नीविरुद्ध दिल्ली आणि नोएडा पोलिसांकडे तक्रार केली. एवढेच नाही तर त्यांनी केंद्र सरकारला पत्र पाठवून त्यांच्या पत्नीविरुद्ध चौकशीची मागणी केली आहे. लोकेश यांचे लग्न सुमारे ६ वर्षांपूर्वी मथुरा येथील एका महिलेशी झाले होते. दोघांनीही २०१९ च्या डिसेंबर महिन्यात एका मॅट्रिमोनियल वेबसाइटद्वारे लग्न केले. मार्च २०२० मध्ये लोकेशची यांची पत्नी बेपत्ता झाली.
पत्नीच्या पासपोर्टची चौकशी करण्याची मागणी
लोकेश राठी यांनी सांगितले की, त्यांची पत्नी २०२० मध्ये होळीनिमित्त मथुरा येथील तिच्या माहेरी गेली होती आणि परत आली नाही. पत्नीचा शोध घेण्यासाठी त्यांनी नोएडाच्या सेक्टर-३९ पोलिस ठाण्यात बेपत्ता व्यक्तीची तक्रार दाखल केली होती. महिलेचा शोध घेतला असता नवीन रहस्ये उघड झाली. आता लोकेश यांनी त्यांच्या पत्नीचा पासपोर्ट देखील तपासण्याची मागणी केली आहे.
पाकिस्तानातील मुलाशी लग्न
लोकेश राठी सांगतात की, त्यांची पत्नी अनेक वेळा पाकिस्तानला गेली आहे. यासोबतच त्यांची पत्नी २००४ मध्ये चीनला गेली होती. ती चीनमध्ये शिक्षण घेण्यासाठी गेली होती. तसेच त्यांच्या पत्नीचे पहिले लग्न २००८ मध्ये झाले होते. तिने पाकिस्तानातील अतिक नावाच्या व्यक्तीशी लग्न केले होते. दोघांनाही एक मुलगा आहे, जो पाकिस्तानात राहतो. जेव्हा ती चीनमध्ये राहत होती, तेव्हाही ती पाकिस्तानला गेली होती आणि तीन महिन्यांहून अधिक काळ तिथे राहिली.
व्यावसायिकाला जीवे मारण्याची धमकी
लोकेश यांनी असेही सांगितले की, जेव्हा त्यांनी त्यांच्या पत्नीच्या पाकिस्तान दौऱ्यांबद्दल आणि तिच्या ठावठिकाणाबद्दल माहिती मिळविण्याचा प्रयत्न केला तेव्हा त्यांना आणि त्यांच्या कुटुंबाला जीवे मारण्याच्या धमक्या येऊ लागल्या. लोकेश यांच्या पत्नीने त्यांच्याविरुद्ध घरगुती हिंसाचार आणि हुंड्यासाठी छळ केल्याचा खटलाही दाखल केला. हुंड्यासाठी छळ केल्याबद्दल आरोपपत्र दाखल करण्यात आले होते, ज्याला लोकेश यांनी उच्च न्यायालयात आव्हान दिले. परंतु त्यांच्या पत्नीवर घरगुती हिंसाचाराच्या खटल्याच्या सुनावणीदरम्यान हजर न राहण्याचा आरोप आहे.
