नवी दिल्ली: पाकिस्तानने अफगाणिस्तानातील एका निवासी भागात हल्ला केल्याची माहिती समोर आली आहेत. ही घटना अफगाणिस्तान आणि पाकिस्तानमधील शांतता चर्चेदरम्यान घडली. यामध्ये सहा अफगाणी नागरिकांचा मृत्यू झाला आहे. कंधार प्रांतातील स्पिन बोल्दाक येथे हल्ला करण्यात आला. झालेल्या हल्ल्यात महिला आणि मुलांचाही मृत्यू झाल्याची शक्यता आहे. पाकिस्तानी हल्ल्यांमध्ये मालमत्तेचेही मोठे नुकसान झाले.
गेल्या काही दिवसांपासून दोन्ही देशांतील संबंध खराब झाले आहेत. त्यापार्श्वभूमीवर पाकिस्तानी सैन्याने अफगाणिस्तानातील निवासी भागांना लक्ष्य केले. कंधार प्रांतातील स्पिन बोल्दाक येथे महिला आणि मुलांसह सहा नागरिकांचा मृत्यू झाला आणि पाच जण जखमी झाले. इस्तंबूलमध्ये अफगाणिस्तान आणि पाकिस्तान यांच्यातील शांतता चर्चेच्या तिसऱ्या फेरीदरम्यान हा हल्ला झाला.
या घटनेनंतर चर्चा स्थगित करण्यात आली आहे. पुन्हा चर्चा सुरू करण्याची कोणतीही शक्यता सध्या तरी नाही, असे पाकिस्तानचे संरक्षण मंत्री ख्वाजा मुहम्मद आसिफ यांनी शुक्रवारी सांगितले.
अफगाण नागरिकांना लक्ष्य
हयतुल्लाह या अफगाण नागरिकाने सांगितले की, या हल्ल्यात त्याची आई ठार झाली आणि त्याची मुलगी जखमी झाली. दोन किंवा तीन तोफगोळे त्यांच्या घरावर आदळले. दोन तोफगोळे त्यांच्या घरावर आदळले, यामध्ये त्याचा मुलगा आणि नातू ठार झाले. कुटुंबातील इतर दोन सदस्य जखमी झाले. त्यांना काय होत आहे हे कोणालाही माहिती नाही.
पाकिस्तानी हल्ल्यांमुळे मालमत्तेचे मोठे नुकसान
निवासी भागांव्यतिरिक्त, स्पिन बोल्दाकमधील एका व्यावसायिक केंद्रालाही पाकिस्तानी लष्कराच्या हल्ल्यांमध्ये लक्ष्य करण्यात आले, यामुळे व्यवसाय आणि मालमत्तेचे मोठे नुकसान झाले. हे हल्ले आंतरराष्ट्रीय कायद्याचे उघड उल्लंघन आहेत. पाकिस्तानने युद्धबंदीचे उल्लंघन केले आणि कोणत्याही चिथावणीशिवाय नागरिकांवर हल्ला केला.
पाकिस्तानच्या खैबर पख्तूनख्वा प्रांतात हातबॉम्ब स्फोटात तीन जणांचा मृत्यू झाला आणि एक गंभीर जखमी झाला. शुक्रवारी खैबरच्या बारा तहसीलमध्ये एका व्यक्तीच्या घरी ही घटना घडली. जखमी व्यक्तीला डोगरा रुग्णालयात नेण्यात आले. पोलिसांनी तातडीने परिसराला घेराव घातला आणि स्फोटाचे कारण शोधण्यास सुरुवात केली.
