Donald Trump Nobel Prize : अमेरिकेचे माजी राष्ट्राध्यक्ष डोनाल्ड ट्रम्प यांना नोबेल शांतता पुरस्कार मिळाल्याच्या चर्चांनी सध्या आंतरराष्ट्रीय राजकारणात खळबळ उडवली आहे. व्हेनेझुएलाच्या विरोधी पक्षनेत्या मारिया कोरिना मचाडो यांनी गुरुवारी व्हाईट हाऊसमध्ये ट्रम्प यांची भेट घेतल्यानंतर या चर्चांना अधिकच हवा मिळाली.
व्हेनेझुएलामधील राजकीय संकटाच्या पार्श्वभूमीवर ही भेट महत्त्वाची मानली जात आहे. काही वृत्तांनुसार, या भेटीदरम्यान मचाडो यांनी ट्रम्प यांना नोबेल शांतता पुरस्काराचे पदक दिल्याचा दावा करण्यात आला. मात्र, याबाबत कोणतीही अधिकृत घोषणा करण्यात आलेली नाही.
ट्रम्प यांनी स्वतःही हा पुरस्कार स्वीकारल्याची स्पष्ट माहिती दिलेली नाही. तसेच, नोबेल शांतता पुरस्कार देणाऱ्या संस्थेने याआधीच स्पष्ट केले आहे की हा पुरस्कार हस्तांतरित किंवा प्रतीकात्मक स्वरूपात देण्याची कोणतीही तरतूद नाही.
या महिन्याच्या सुरुवातीला अमेरिकेने व्हेनेझुएलाचे माजी राष्ट्राध्यक्ष निकोलस मादुरो यांच्याविरोधात कठोर पावले उचलल्यानंतर देशाच्या राजकीय भवितव्यावर मोठा वाद सुरू झाला आहे. अशाच पार्श्वभूमीवर मारिया मचाडो दुपारच्या जेवणाच्या बैठकीसाठी व्हाईट हाऊसमध्ये पोहोचल्या होत्या.
माध्यमांनी ट्रम्प यांना नोबेल पुरस्कार दिला का, असा थेट प्रश्न विचारला असता मचाडो यांनी उत्तर देणे टाळले. हा एक “प्रतीकात्मक आणि भावनिक क्षण” असल्याचे सांगत त्यांनी अधिक भाष्य केले नाही.
दरम्यान, डोनाल्ड ट्रम्प यांनी आतापर्यंत आठ युद्धे थांबवण्यात आपण भूमिका बजावल्याचा दावा केला आहे. यामध्ये भारत-पाकिस्तान संघर्षाचाही उल्लेख त्यांनी केला आहे. या कामगिरीच्या आधारे ट्रम्प यांनी यापूर्वीही नोबेल शांतता पुरस्कार मिळायला हवा, अशी भूमिका वारंवार मांडली आहे.
