US vs Iran : अमेरिका आणि इराण यांच्यातील तणाव आता निर्णायक टप्प्यावर पोहोचल्याचं चित्र आहे. या पार्श्वभूमीवर डोनाल्ड ट्रम्प यांनी पश्चिम आशियात अमेरिकेची लष्करी ताकद वाढवण्याचा मोठा निर्णय घेतल्याची माहिती समोर आली आहे. अमेरिकेने अत्याधुनिक विमानवाहू युद्धनौका तैनात करण्याचा निर्णय घेतल्याने आंतरराष्ट्रीय पातळीवर खळबळ उडाली आहे.
आधीच अमेरिकेचं एक युद्धनौदल तैनात असताना आता आणखी एक शक्तिशाली तुकडी त्या भागात पाठवली जाणार असल्याचं सांगितलं जात आहे. त्यामुळे मध्यपूर्वेतील लष्करी समीकरणं बदलण्याची शक्यता व्यक्त केली जात आहे. काही आंतरराष्ट्रीय तज्ज्ञांच्या मते हा निर्णय इराणवर दबाव वाढवण्यासाठीचा धोरणात्मक भाग असू शकतो, तर काहींच्या मते परिस्थिती थेट संघर्षाकडेही वळू शकते.
दरम्यान, अमेरिकेच्या हालचालींना प्रादेशिक राजकारणाचीही जोड मिळताना दिसत आहे. अमेरिकेच्या उपराष्ट्रपतींनी अलीकडेच आर्मेनिया दौरा केला होता. आर्मेनिया हा इराणचा शेजारी देश असून दोन्ही देशांमध्ये थेट सीमा आहे. त्यामुळे या भेटीला सामरिक महत्त्व दिलं जात आहे.
दुसरीकडे पाकिस्तान, तुर्की आणि इतर काही देशांनी अमेरिकेला आपला लष्करी तळ वापरू देण्यास नकार दिल्याची चर्चा आहे. त्यामुळे अमेरिका पर्यायी धोरणावर काम करत असल्याचे संकेत मिळत आहेत.
या घडामोडींमुळे इराणचे सर्वोच्च नेते अयातुल्ला अली खामेनेई यांच्यावरही दबाव वाढण्याची शक्यता व्यक्त होत आहे. परिणामी, अमेरिकेच्या या निर्णयाकडे आता संपूर्ण जगाचं लक्ष लागलं असून पुढील काही दिवस मध्यपूर्वेसाठी निर्णायक ठरू शकतात.
