मुंबई: वादग्रस्त वक्तव्य आणि विधिमंडळात रमी खेळण्याच्या प्रकरणामुळे विरोधकांच्या टीकेचे लक्ष्य ठरलेले कृषीमंत्री माणिकराव कोकाटे यांची उपमुख्यमंत्री अजित पवार यांनी मंगळवारी कडक शब्दांत कानउघडणी केली. मंगळवारी मंत्रालयात पवार आणि कोकाटे यांच्यात २० मिनिटांची बैठक पार पडली. मात्र, या बैठकीत कोणताही स्पष्ट निर्णय न झाल्याने कोकाटे यांच्या कारवाई बाबत सस्पेन्स कायम आहे.
सूत्रांच्या माहितीनुसार, बैठकीत अजित पवार यांनी कोकाटे यांच्या कृतीबद्दल तीव्र शब्दात नाराजी व्यक्त केली, तर कोकाटे यांनी आपली बाजू मांडत घडलेल्या प्रकाराबद्दल दिलगिरी व्यक्त केली. परंतु, कोकाटेंच्या राजीनाम्याबाबत कोणताही स्पष्ट निर्णय झाला नाही. यानंतर झालेल्या मंत्रिमंडळाच्या बैठकीतही मुख्यमंत्री देवेंद्र फडणवीस यांनी कोकाटे यांच्यासह महायुतीच्या वादग्रस्त मंत्र्यांना तंबी दिल्याचे समजते. मंत्रिमंडळाची बैठक संपताच माध्यमांना गुंगारा देत कोकाटे मंत्रालयातून बाहेर पडत त्यांनी पक्ष कार्यालय गाठले.
कोकाटे यांचा विधान परिषदेतील रमी खेळतानाचा व्हिडीओ व्हायरल झाल्यानंतर त्यांच्याविरोधात राज्यभरात संताप व्यक्त करण्यात आला. त्यांच्यावर कारवाईची मागणी करण्यासाठी गेलेल्या छावा संघटनेच्या पदाधिकाऱ्यांना राष्ट्रवादीचे युवक अध्यक्ष सूरज चव्हाण यांनी बेदम मारहाण केल्यानंतर कोकाटे यांच्याविरोधातील आंदोलन आणखीनच पेटले होते. याबाबत पवार यांनी मंगळवारी कोकाटे यांच्याबाबत निर्णय घेऊ, असे सांगितले होते. त्यानुसार, मंगळवारी पवार यांनी कोकाटे यांच्यासोबत चर्चा केली, मात्र या बैठकीनंतर कोकाटे यांच्यावरील कारवाई बाबतचा सस्पेन्स कायम आहे.
