PMC Election Result 2026: महाराष्ट्र महानगरपालिका निवडणुकीच्या निकालांमध्ये पुणे शहरातून अत्यंत चुरशीचे कल आणि निकाल समोर येत आहेत. पुण्यात भाजप आणि राष्ट्रवादी काँग्रेसमध्ये काट्याची टक्कर पाहायला मिळत असून, पहिल्या निकालात भाजपने बाजी मारली आहे. तर दुसरीकडे, काही दिग्गजांना विजयाचा आनंद आणि पराभवाचे दुःख एकाच वेळी पचवावे लागत असल्याचे चित्र दिसत आहे.
बिबवेवाडीत भाजपचे वर्चस्व; राष्ट्रवादीचे गौरव घुले विजयी
पुणे महापालिकेचा पहिला निकाल प्रभाग क्रमांक २० (शंकर महाराज मठ, बिबवेवाडी) मधून जाहीर झाला आहे. या प्रभागातून भाजपचे तीन उमेदवार राजेंद्र शिळीमकर, तन्वी दिवेकर आणि मानसी देशपांडे यांनी दणदणीत विजय मिळवला आहे. मात्र, याच प्रभागात भाजपच्या पॅनलला सुरुंग लावत राष्ट्रवादी काँग्रेसचे गौरव घुले यांनी भाजपचे महेंद्र सुंदेचा यांचा पराभव करून विजय संपादन केला आहे.
प्रशांत जगतापांचा विजय, आईचा पराभव
पुण्यातील हायव्होल्टेज लढतींपैकी एक असलेल्या प्रभागात काँग्रेस नेते प्रशांत जगताप यांनी आपला विजय निश्चित केला आहे. मात्र, जगताप यांच्यासाठी हा निकाल संमिश्र ठरला आहे; कारण त्यांचे स्वतःचे वर्चस्व सिद्ध झाले असले तरी त्यांच्या आईला मात्र या निवडणुकीत पराभवाचा सामना करावा लागला आहे.
काँग्रेसचे खाते उघडले; बापट आणि मानकर यांची मोठी आघाडी
शहरातील मतमोजणीत काँग्रेसनेही आपली उपस्थिती दर्शवली असून, प्रभाग क्रमांक १८ मधून साहिल केदारी यांनी विजय मिळवत काँग्रेसचे खाते उघडले आहे. दरम्यान, प्रभाग २५ मध्ये भाजप उमेदवारांनी मोठी आघाडी घेतली आहे. दिवंगत खासदार गिरीश बापट यांच्या स्नुषा स्वरदा बापट १३,९०० मतांनी, तर बापू मानकर १५,५०५ मतांनी आघाडीवर आहेत. स्वप्नाली पंडित यांनीही ५,३७४ मतांची आघाडी घेत विजयाकडे वाटचाल सुरू केली आहे.
रुपाली ठोंबरे पिछाडीवर; ईव्हीएमवरून केंद्रात गोंधळ
प्रभाग २५ मधून राष्ट्रवादी काँग्रेस (अजित पवार गट) च्या आक्रमक नेत्या रुपाली ठोंबरे पाटील पिछाडीवर आहेत. मतमोजणी दरम्यान त्यांनी न्यू इंग्लिश स्कूल येथील केंद्रावर मोठा गोंधळ घातल्याची माहिती समोर आली आहे. ईव्हीएम (EVM) मशीन बदलल्याचा गंभीर आरोप करत ठोंबरे यांनी आक्षेप घेतल्याने काही काळ मतमोजणी थांबवण्यात आली होती. त्यांच्या या पवित्र्यामुळे केंद्रावर तणावाचे वातावरण निर्माण झाले होते.
