Local Body Election : राज्यातील स्थानिक स्वराज्य संस्थांच्या नुकत्याच झालेल्या निवडणुकांच्या निकालावरून निर्माण झालेला कायदेशीर पेच अखेर सर्वोच्च न्यायालयाने स्पष्टपणे निकाली काढला आहे. निवडणुकांचा निकाल २१ डिसेंबरलाच जाहीर व्हावा, असा नागपूर खंडपीठाने दिलेला आदेश सर्वोच्च न्यायालयाने कायम ठेवत, मतमोजणी पुढे ढकलण्याची मागणी थेट फेटाळून लावली आहे.
पूर्वीचा आदेश कायम
या प्रकरणाची सुनावणी नुकतीच सर्वोच्च न्यायालयात झाली. याचिकाकर्त्यांनी २ डिसेंबरला पार पडलेल्या मतदानाचा आणि २० डिसेंबरला होणाऱ्या मतदानाचा निकाल वेगवेगळ्या दिवशी जाहीर व्हावा, अशी मागणी केली होती. त्यांचे म्हणणे होते की निकाल २१ डिसेंबरपर्यंत थांबवू नये. मात्र, न्यायालयाने ही याचिका ग्राह्य धरण्यास नकार देत, पूर्वीचा आदेशच कायम ठेवल्याचे स्पष्ट केले.
हेही वाचा – मोठी बातमी! BMC निवडणूक दुसऱ्या आठवड्यातच होणार; राज्य निवडणूक आयोगाची तयारी जोरात
दोन्ही टप्प्यांचा निकाल एकाच दिवशी
सर्वोच्च न्यायालयाने आपल्या निर्णयात ठाम सांगितले की, २ डिसेंबर आणि २० डिसेंबरला झालेल्या दोन्ही मतदानांचा निकाल एकत्रितरित्या २१ डिसेंबरलाच घोषित केला जाईल.
राज्य निवडणूक आयोगाला स्पष्ट निर्देश
न्यायालयाने राज्य निवडणूक आयोगाला महत्त्वाचे निर्देश दिले आहेत. २० डिसेंबरच्या मतदानात कोणतीही अडचण निर्माण झाली किंवा मतदान पार पडू शकले नाही, तरीही निकालाची तारीख बदलणार नाही. निवडणुकीची प्रक्रिया आणखी लांबणीवर टाकण्यास न्यायालयाने ठाम मनाई केली आहे. संपूर्ण निवडणूक प्रक्रिया वेळेत पूर्ण करणे बंधनकारक असल्याचे न्यायालयाने पुन्हा अधोरेखित केले.
हेही वाचा – महापालिका निवडणुकीसाठी आचारसंहिता ‘या’ दिवशी लागणार? मंत्री चंद्रकांत पाटील यांनी सांगितली तारीख
राजकीय वर्तुळात निकालाची उत्सुकता शिगेला
सर्वोच्च न्यायालयाच्या आदेशानंतर आता २१ डिसेंबर हा अंतिम निकालाचा दिवस निश्चित झाला असून, स्थानिक स्वराज्य संस्थांच्या नियंत्रणासाठी प्रयत्न करणाऱ्या सर्व राजकीय पक्षांची उत्सुकता ताणावर पोहोचली आहे. उमेदवारांमध्येही निकाल जाहीर होण्याची प्रतिक्षा अधिक तीव्र झाली आहे.
