Jarange Patil On Dhananjay Munde: मराठा आरक्षण चळवळीचे नेतृत्व करणारे मनोज जरांगे पाटील यांनी पुन्हा एकदा मोठा आरोप करत महाराष्ट्राच्या राजकारणात खळबळ माजवली आहे. याआधी त्यांनी माझ्या हत्येची सुपारी धनंजय मुंडेंनी दिली असा गंभीर आरोप केला होता. त्या आरोपांनंतर धनंजय मुंडे यांनी सर्व दावे फेटाळून लावले होते. पण आता जरांगे यांनी पुन्हा माध्यमांसमोर येत धनंजय मुंडे आणि आरोपी यांच्यातील संभाषणाची ऑडिओ क्लिप सार्वजनिक केली आहे.
साहेब, तुम्ही आले का परळीला?
पत्रकार परिषदेत मनोज जरांगे पाटलांनी प्रथम दोन अटक आरोपींच्या संभाषणाची क्लिप ऐकवली आणि त्यानंतर धनंजय मुंडे आणि एका आरोपीमधील संवादाचा ऑडिओ ऐकवला. या क्लिपमध्ये आरोपी म्हणतो ‘साहेब, तुम्ही आले का परळीला?’ यावर मुंडे उत्तर देतात,“नाही, अजून पुण्याला आहे… गरबड करू नका.” यानंतर आरोपी विचारतो, “गाडीचं काय झालं?” त्यावर मुंडे म्हणतात, “आता नवीन गाडी देऊ शकत नाही, जुनी गाडी देऊ शकतो.”
माझ्या अंगावर गाडी घालायची होती – जरांगे पाटील
या क्लिपनंतर पत्रकारांनी गाडीविषयी विचारले असता जरांगे म्हणाले, ही तीच गाडी आहे जी आमच्या ताफ्यात देण्यात येणार होती आणि नंतर आमच्या अंगावर घालायची होती. जर ही क्लिप खोटी असेल तर सीडीआर काढा, लोकेशन तपासा. कोण कुठे होतं, कोण कुणाला भेटलं. सर्व समोर येईल. ते पुढे म्हणाले की, माझं आणि धनंजय मुंडेंचं वैर नाही. पण माझ्या मुळावर प्रहार करण्याचा प्रयत्न होत आहे. हे गंभीर आहे.
मी सगळ्या गोष्टींना तयार आहे
दरम्यान, जरांगे पाटील यांनी सांगितले की, मी सगळ्या गोष्टींना तयार आहे. अशा प्रवृत्ती समाजासाठी घातक आहेत. आता ओबीसींना यात ओढून घेणं योग्य नाही. अजित दादा, फडणवीस साहेब आणि शिंदे साहेब यांनी या प्रकरणाचा छडा लावावा. ते पुढे म्हणाले, मराठा समाजाने शांत राहावे. मी सगळं नीट करतोय. फक्त मला थोडा वेळ द्या.
