Sambhajinagar: राज्यातील २९ महापालिकांच्या निवडणुकीचा निकाल आज जाहीर होत असतानाच छत्रपती संभाजीनगरमध्ये एका अत्यंत धक्कादायक घटनेने राजकीय वातावरण तापले आहे. उस्मानपुरा येथील शासकीय अभियांत्रिकी महाविद्यालयातील मतमोजणी केंद्राबाहेर पोलिसांनी केलेल्या लाठीमारात शिवसेना (शिंदे गट) नेते आणि माजी महापौर विकास जैन हे गंभीर जखमी झाले आहेत.
पोलिसांकडून अचानक लाठीचार्ज
आज सकाळी मतमोजणी सुरू होण्यापूर्वी निकालाची उत्सुकता असल्याने कार्यकर्त्यांनी केंद्राबाहेर मोठ्या प्रमाणावर गर्दी केली होती. यावेळी गर्दीवर नियंत्रण मिळवण्यासाठी पोलिसांनी अचानक लाठीचार्ज सुरू केला. या कारवाईदरम्यान पोलिसांनी विकास जैन यांना घेरून मारहाण केली, ज्यामध्ये त्यांच्या हाताला गंभीर दुखापत झाली असून त्यांचा हात मोडल्याची प्राथमिक माहिती समोर आली आहे. या घटनेचे काही व्हिडिओही समोर आले असून, त्यामध्ये पोलीस सामान्य नागरिकांना आणि प्रतिनिधींना अक्षरशः झाडाझुडपात गाठून मारहाण करताना दिसत आहेत. या कारवाईत केवळ नागरिकच नव्हे तर कर्तव्यावर असलेल्या काही पत्रकारांनाही पोलिसांच्या लाठ्यांचा सामना करावा लागला आहे.
संजय शिरसाट यांचा संताप –
या घटनेची माहिती मिळताच जिल्ह्याचे पालकमंत्री संजय शिरसाट यांनी घटनास्थळाचा आढावा घेतला आणि पोलीस प्रशासनाच्या कार्यपद्धतीवर टीकेची झोड उठवली. पोलिसांचा हा ‘मस्तवालपणा’ असल्याचे सांगत त्यांनी तीव्र संताप व्यक्त केला. शिरसाट म्हणाले की, “ज्यांच्याकडे अधिकृत ओळखपत्रे आहेत अशा प्रतिनिधींनाही जनावरांसारखी मारहाण करण्यात आली आहे. मतमोजणीच्या वेळी पोलिसांनी किमान सामंजस्य दाखवणे आवश्यक होते.”
विशेषतः सागर देशमुख नावाच्या पोलीस अधिकाऱ्याचा उल्लेख करत त्यांनी त्यांच्यावर कठोर कारवाई करण्याची मागणी केली. वरिष्ठ अधिकारी घटनास्थळी फिरकायला तयार नसल्याबद्दलही त्यांनी नाराजी व्यक्त केली. या संपूर्ण प्रकरणाची तक्रार आपण एकनाथ शिंदे यांच्याकडे करणार असून, दोषी अधिकाऱ्यांवर कडक कारवाई झाल्याशिवाय गप्प बसणार नाही, असा इशाराही त्यांनी दिला. मतमोजणीच्या सुरुवातीलाच झालेल्या या राड्यामुळे शहरात तणावाचे वातावरण निर्माण झाले असून, आता पोलीस आयुक्त यावर काय भूमिका घेतात, याकडे सर्वांचे लक्ष लागले आहे.
