Dhananjay Munde Delhi Visit: राज्याच्या राजकारणात खळबळ उडवणाऱ्या घडामोडी समोर येत आहेत. राष्ट्रवादी काँग्रेस (अजित पवार गट) नेते आणि मंत्री माणिकराव कोकाटे यांच्या विरोधात नाशिक सत्र न्यायालयाने एका प्रकरणात अटक वॉरंट बजावल्याने त्यांची अडचण मोठ्या प्रमाणात वाढली आहे. या आदेशानंतर कोकाटे यांना कधीही अटक होऊ शकते, अशी परिस्थिती निर्माण झाली आहे. या पार्श्वभूमीवर राजकीय चर्चांना अधिकच उधाण आलं आहे. कारण त्याचवेळी मंत्री धनंजय मुंडे सध्या दिल्ली दौऱ्यावर असल्याची माहिती समोर आली आहे. कोकाटे यांच्या मंत्रिपदावर संकट निर्माण झाल्यामुळे, हे पद आता धनंजय मुंडे यांच्याकडे जाणार का, अशी चर्चा राजकीय वर्तुळात सुरू झाली आहे.
दरम्यान, करुणा मुंडे यांनी यावर भाष्य करत मोठा दावा केला आहे. माणिकराव कोकाटे यांच्या अडचणी वाढल्यानंतर धनंजय मुंडे यांनी दिल्लीमध्ये जाऊन केंद्रीय गृहमंत्री अमित शहा यांची भेट घेतल्याचा दावा त्यांनी केला. धनंजय मुंडे हे लवकरच भाजपमध्ये प्रवेश करतील, असा गौप्यस्फोटही करुणा मुंडे यांनी केला आहे.
करुणा मुंडे यांच्या म्हणण्यानुसार, धनंजय मुंडे यांच्यावर विविध आरोप असून वाल्मिक कराड प्रकरणातही त्यांची अडचण वाढण्याची शक्यता आहे. या सगळ्या प्रकरणातून मार्ग काढण्यासाठीच दिल्लीमध्ये हालचाली सुरू आहेत, असा दावाही त्यांनी केला आहे. वाल्मिक कराड याला बाहेर काढण्यासाठी आणि संपूर्ण प्रकरणातून सुटका करून घेण्यासाठी प्रयत्न सुरू असल्याचा आरोपही त्यांनी केला.
तथापी, करुणा मुंडे यांनी जाहीर केलं की, या मुद्द्यावर त्या शनिवारी पत्रकार परिषद घेणार असून, या लढ्यात साथ देण्यासाठी ५० राजकीय पक्षांना आवाहन करणार आहेत. दुसरीकडे, माणिकराव कोकाटे यांच्या अडचणी अधिक गंभीर झाल्या आहेत. अटक वॉरंट रद्द करण्यासाठी किंवा शिक्षेला स्थगिती मिळावी म्हणून त्यांनी उच्च न्यायालयात धाव घेतली होती. मात्र, न्यायालयाने तातडीची सुनावणी घेण्यास नकार दिला आहे. या प्रकरणावर आता शुक्रवारी सुनावणी होणार आहे.
