मुंबई: ३ जून रोजी होणारा IPL २०२५ चा अंतिम सामना आता कोलकाताऐवजी अहमदाबादच्या नरेंद्र मोदी स्टेडियममध्ये खेळवला जाईल. १ जून रोजी अहमदाबादमधील याच स्टेडियममध्ये क्वालिफायर-२ देखील होईल. त्याचवेळी, क्वालिफायर-१ पंजाबमधील मुल्लांपुर येथील महाराजा यादविंद्र सिंह आंतरराष्ट्रीय क्रिकेट स्टेडियममध्ये खेळवला जाईल. यासोबतच, एलिमिनेटर सामने २९ आणि ३० मे रोजी मुल्लांपुर येथे होतील.
आयपीएल २०२५ मध्येच थांबवण्यात आले
पहलगाम दहशतवादी हल्ल्यानंतर भारत आणि पाकिस्तानमधील वाढत्या तणावामुळे आयपीएल २०२५ मध्येच थांबवण्यात आले. नंतर, जेव्हा दोन्ही देशांनी युद्धबंदीची घोषणा केली, तेव्हा बीसीसीआयने आयपीएलचे सुधारित वेळापत्रक जाहीर केले. आठवड्याभराच्या विश्रांतीनंतर, आयपीएल २०२५ चा हंगाम १७ मे रोजी पुन्हा सुरू झाला.
बीसीसीआयने आयपीएल २०२५ च्या अंतिम सामन्याचे ठिकाण बदलले
पूर्वीच्या योजनेनुसार, अंतिम सामना आणि क्वालिफायर २ कोलकात्यातील ईडन गार्डन्स येथे खेळवण्यात येणार होते. तर, क्वालिफायर १ आणि एलिमिनेटर हैदराबादमधील राजीव गांधी आंतरराष्ट्रीय स्टेडियमवर होणार होते.
त्याचवेळी, बीसीसीआयच्या आयपीएल २०२५ च्या सुधारित वेळापत्रकात या सामन्यांचे स्थान बदलण्यात आले आहे. आता ३ जून रोजी होणारा आयपीएल २०२५ चा अंतिम सामना कोलकाताऐवजी अहमदाबाद येथील नरेंद्र मोदी स्टेडियममध्ये खेळवला जाईल. १ जून रोजी अहमदाबादमधील याच स्टेडियममध्ये क्वालिफायर-२ देखील होईल. त्याच वेळी, क्वालिफायर-१ पंजाबमधील मुल्लांपुर येथील महाराजा यादविंद्र सिंह आंतरराष्ट्रीय क्रिकेट स्टेडियममध्ये खेळवला जाईल. यासोबतच, एलिमिनेटर सामने २९ आणि ३० मे रोजी मुल्लांपुर येथे होतील.
‘या’ संघांनी प्लेऑफमध्ये प्रवेश केला
आतापर्यंत गुजरात टायटन्स, रॉयल चॅलेंजर्स बंगळुरू आणि पंजाब किंग्ज यांनी प्लेऑफमध्ये आपले स्थान निश्चित केले आहे. प्लेऑफमधील चौथा संघ मुंबई इंडियन्स आणि दिल्ली कॅपिटल्स यांच्यातील सामन्याद्वारे निश्चित होणार आहे. जर बुधवारी वानखेडे स्टेडियमवर मुंबई इंडियन्सने दिल्ली कॅपिटल्सचा पराभव केला तर हार्दिक पंड्याच्या नेतृत्वाखालील संघ प्लेऑफमध्ये पोहोचेल. पण जर दिल्ली जिंकली तर ही शर्यत आणखी काही दिवस चालू राहू शकते.
पॉइंट्स टेबलमध्ये गुजरात टायटन्स अव्वल स्थानावर
गुजरात टायटन्स पॉइंट्स टेबलमध्ये अव्वल स्थानावर आहे, रॉयल चॅलेंजर्स बंगळुरू दुसऱ्या आणि पंजाब किंग्ज तिसऱ्या क्रमांकावर आहेत. मुंबई आणि दिल्ली चौथ्या आणि पाचव्या क्रमांकावर आहेत. लखनौ, कोलकाता नाईट रायडर्स, सनरायझर्स हैदराबाद, राजस्थान रॉयल्स आणि चेन्नई सुपर किंग्ज प्लेऑफच्या शर्यतीतून बाहेर पडले आहेत. शेवटचा लीग सामना २७ मे रोजी लखनौच्या एकाना स्टेडियमवर लखनौ सुपर जायंट्स आणि रॉयल चॅलेंजर्स बंगळुरू यांच्यात खेळला जाईल.
