Women Maharashtra kesari 2026 : मातीतील कुस्तीचा थरार आणि महिला कुस्तीपटूंचा कस लागलेल्या ‘महिला महाराष्ट्र केसरी २०२६’ या प्रतिष्ठित किताबावर कोल्हापूरच्या अमृता पुजारीने आपले नाव कोरले आहे. सोलापुरातील हरीभाई देवकरण प्रशालेच्या मैदानावर पार पडलेल्या चुरशीच्या अंतिम लढतीत अमृताने प्रतिस्पर्धी वेदिका सासनेचा ७-० अशा गुणाधिक्याने पराभव करत मानाची चांदीची गदा पटकावली.
मैदानात अमृताचा दबदबा; वेदिकाची झुंज अपयशी
महाराष्ट्र राज्य कुस्तीगीर संघ आणि निर्झरा फाऊंडेशन यांच्या वतीने आयोजित या स्पर्धेचा अंतिम सामना अत्यंत चुरशीचा ठरला. कुस्तीच्या सुरुवातीपासूनच अमृताने आक्रमक पवित्रा घेत वेदिकावर वर्चस्व राखले. पहिल्या दीड मिनिटातच २ गुण घेत अमृताने आघाडी घेतली आणि सत्राच्या अखेरीस ५-० असा स्कोअर केला. दुसऱ्या सत्रात वेदिकाने पुनरागमन करण्याचा प्रयत्न केला, मात्र अमृताने संयमी बचाव आणि चपळ हालचालींच्या जोरावर आणखी २ गुण मिळवले. अखेरच्या दोन मिनिटांत भक्कम ‘डिफेन्स’ करत अमृताने ७-० अशा मोठ्या फरकाने विजय मिळवत मैदान मारले.
विजेतीला ‘सोनेट कार’ तर उपविजेतीला ‘बुलेट’
विजेत्या अमृता पुजारीला पालकमंत्री जयकुमार गोरे यांच्या हस्ते मानाची चांदीची गदा, स्मृतिचिन्ह, ५१ हजार रुपये रोख आणि किआ सोनेट (Kia Sonet) कारची चावी प्रदान करण्यात आली. उपविजेत्या ठरलेल्या वेदिका सासनेला २५ हजार रुपये रोख, स्मृतिचिन्ह आणि बुलेट देऊन गौरविण्यात आले. विजयानंतर अमृताचे प्रशिक्षक दादासो लवटे आणि समर्थकांनी हलगीच्या कडकडाटात तिची विजयी मिरवणूक काढली.
महिला कुस्तीसाठी ५० लाखांच्या निधीचा प्रस्ताव – जयकुमार गोरे
यावेळी बोलताना पालकमंत्री जयकुमार गोरे यांनी महत्त्वपूर्ण घोषणा केली. ते म्हणाले, “पुरुष कुस्ती स्पर्धेसाठी सरकार एक कोटींचा निधी देते, मात्र महिला कुस्तीसाठी अद्याप स्वतंत्र तरतूद नाही. त्यामुळे पुढील वर्षापासून महिला महाराष्ट्र केसरी स्पर्धेसाठी राज्य शासनाने ५० लाख रुपयांचा निधी द्यावा, असा अधिकृत प्रस्ताव मी मुख्यमंत्री देवेंद्र फडणवीस यांच्याकडे सादर करणार आहे.”
