मुंबई : सणासुदीच्या काळात प्रत्येकजण Amazon Great Indian Festival आणि Flipkart Big Billion Days सारख्या मोठ्या सेलची वाट पाहत आहे. मात्र, खऱ्या ऑफर्सबद्दल उत्साह असताना स्कॅमर देखील या संधीचा गैरफायदा घेऊ शकतात. सेल फक्त काही दिवसांवर आहे आणि स्कॅमर आधीच लोकांना आकर्षित करण्यासाठी बनावट स्क्रीनशॉट आणि लिंक्स शेअर करत आहेत. त्यामुळे काळजी घेणे गरजेचे आहे.
WhatsApp आणि इतर मेसेजिंग अॅप्सवर अनेक फॉरवर्ड केलेले मेसेज फिरत आहेत ज्यात फक्त एक रुपयांत फोन देण्याचा दावा केला जात आहे, तर खरी किंमत २०००० ते ४०००० रुपयांच्या दरम्यान असल्याचे सांगितले जाते. या खोट्या दाव्यांवर विश्वास ठेवून लोक लिंक्सवर क्लिक करतात आणि फसवणुकीचे बळी पडतात. AI मुळे स्कॅमर अधिक हुशार झाले. AI तंत्रज्ञानामुळे परिस्थिती आणखी कठीण झाली आहे.
आता स्कॅमर्ससाठी Amazon किंवा Flipkart सारख्या दिसणाऱ्या क्लोन वेबसाईट आणि स्क्रीनशॉट तयार करणे आश्चर्यकारकपणे सोपे झाले आहे. म्हणूनच खऱ्या आणि बनावट साइट्समध्ये फरक करणे सामान्य लोकांसाठी एक आव्हान बनले आहे.
स्कॅमर्स तयार करतात बनावट वेबसाईट
स्कॅमर या बनावट वेबसाईटवर पेमेंट पेज तयार करतात, जे अगदी खऱ्या वेबसाईटसारखे दिसतात. युजर्स खऱ्या साईटवरून खरेदी करत आहेत, परंतु पेमेंट होताच, पैसे थेट स्कॅमरच्या खात्यात जातात. कधीकधी, तुमची वैयक्तिक माहिती आणि फोटो देखील चुकीच्या हातात जातात. त्यामुळे याकडे लक्ष देण्याची गरज आहे.
