Rohit Arya Encounter: मुंबईतील पवई परिसरातील आर ए स्टुडिओत गुरुवारी दुपारी घडलेल्या थरारक ओलीस प्रकरणात अखेर पोलिसांनी यश मिळवले. १७ मुलांसह १९ जणांना ओलीस ठेवणारा मानसिकदृष्ट्या अस्थिर आरोपी रोहित आर्य याला पोलिसांशी झालेल्या चकमकीत गोळी लागली. तसेच उपचारादरम्यान त्याचा मृत्यू झाला.
आरोपीकडे एअर गन आणि रसायने
पोलीस बाथरूममधून आत घुसले तेव्हा आरोपीकडे एअर गन आणि काही रसायनांच्या बाटल्या आढळल्या. पोलिसांनी त्याला शरण येण्याचे आवाहन केले, परंतु त्याने नकार दिल्याने पोलिसांनी प्रत्युत्तरादाखल गोळीबार केला. जखमी अवस्थेत त्याला जोगेश्वरी ट्रॉमा रुग्णालयात नेण्यात आले, जिथे त्याचा मृत्यू झाला.
हेही वाचा –धक्कादायक! मुंबईत ऑडिशनच्या बहाण्याने माथेफिरुने मुलांना ओलीस ठेवलं; नेमकं काय घडलं? वाचा
मुलांना सुरक्षितरीत्या वाचवले
डीसीपी दत्ता किशन नलावडे यांनी सांगितले की, दुपारी १:४५ वाजता पोलिसांना घटनेची माहिती मिळाल्यानंतर तातडीने विविध पथके घटनास्थळी दाखल झाली. पोलिसांनी मुलांना सुरक्षित बाहेर काढले. घटनास्थळी क्यूआरटी आणि विशेष दल उपस्थित होते.
ऑडिशनच्या नावाखाली फसवणूक
तपासात उघड झाले की, आरोपीने मुलांना वेब सिरीजसाठी ऑडिशन असल्याचे सांगून स्टुडिओत बोलावले होते आणि त्यानंतर त्यांना ओलीस ठेवले. ओलीस ठेवण्यात आलेल्या मुलांचे वय ४ ते ५ वर्षे इतके लहान होते, ज्यामुळे कारवाई अत्यंत संवेदनशील ठरली.
आरोपीचा व्हिडिओ समोर आला
घटनेपूर्वी आरोपीने एक व्हिडिओ प्रसिद्ध केला होता, ज्यात त्याने आर्थिक किंवा राजकीय मागण्या नसून काही लोकांशी ‘नैतिक आणि वैचारिक मुद्द्यांवर’ बोलण्याची इच्छा व्यक्त केली होती. पोलिस आता त्याच्या पार्श्वभूमीचा आणि मानसिक स्थितीचा सखोल तपास करत आहेत.
