जालना: उपमुख्यमंत्री अजित पवार यांनी बारामती येथून आपल्या स्थानिक निवडणूक प्रचाराची औपचारिक सुरुवात केली असून, माळेगाव नगरपंचायतीतील सभेमध्ये त्यांनी स्पष्ट भाषेत भूमिका मांडत कार्यकर्त्यांनाच थेट इशारा दिला. “मी साधूसंत नाही. तुम्ही माझ्यावर विश्वास ठेवून मत दिलं तर मी तुमचं काम करतो. पण तुम्हीच पाठ फिरवली, तर मीही गोड बोलणार नाही,” असे कडक शब्द अजित पवारांनी आपल्या भाषणात उच्चारले. त्यांच्या या वक्तव्याने राजकीय वर्तुळात मोठी खळबळ उडाली असून, विरोधकांनी त्यांच्यावर ‘दमदाटी करण्याचा’ आरोप सुरू केला आहे.
माळेगावच्या सभेत अजित पवार संतापले
माळेगावच्या सभेची चर्चा अजून सुरू असतानाच अजित पवार आज जालना जिल्ह्यातील परतूर येथे सभेला पोहोचले. मात्र, सभा सुरू होण्यापूर्वीच पुन्हा एकदा त्यांचा राग अनावर झाला. राष्ट्रवादी काँग्रेसच्या उमेदवारांसाठी बसायची व्यवस्था योग्य प्रकारे न झाल्याने त्यांनी थेट पोलिसांवर नाराजी व्यक्त केली. व्यासपीठावरून खाली उतरून माईक हातात घेत त्यांनी पोलिसांना फटकारले. ‘माझे उमेदवार कुठे बसणार? खुर्च्या पुढे लावा. मी सांगतोय काढा त्या खुर्च्या, घेऊन या इथे! कळत नाही का तुम्हाला?’ असा संताप त्यांनी पोलिसांसमोर व्यक्त केला. त्यांचा हा व्हिडीओ सोशल मीडियावर प्रचंड व्हायरल झाला आहे.
दरम्यान, दोन्ही सभांमध्ये त्यांनी केलेल्या कठोर वक्तव्यांमुळे अजित पवार पुन्हा एकदा चर्चेच्या केंद्रस्थानी आले आहेत. स्थानिक स्वराज्य संस्थांच्या निवडणुकांच्या तोंडावर ते राज्यभर दौरे करत आहेत आणि पक्षाच्या उमेदवारांना बळ देण्याचा प्रयत्न करत आहेत. मात्र, सभांमधील त्यांच्या तडकाफडकी प्रतिक्रियांमुळे त्यांची शैली आणि भाष्य सतत वादाच्या भोवऱ्यात सापडत आहे.
