Nanded Crime News: नांदेडच्या इतवारा भागात घडलेल्या आंतरजातीय प्रेमप्रकरणातील हत्येमुळे जिल्हा हादरला आहे. गुरुवारी 20 वर्षीय सक्षम ताटे याची निर्घृण हत्या करण्यात आली असून, या घटनेने राज्यभर खळबळ उडाली आहे. सक्षमच्या मृत्यूनंतर त्याची प्रेयसी आंचल मामीडवारने मृतदेहाशी लग्न करून सर्वांना चकित केले. आता आंचलने पुढे येऊन या हत्येच्या संपूर्ण पार्श्वभूमीचा खुलासा करत कुटुंबीयांसह एका पोलीस कर्मचाऱ्यावर गंभीर आरोप लावले आहेत. तिच्या म्हणण्यानुसार, सक्षमची हत्या “प्रेमामुळे आणि जातीय द्वेषातून” घडवून आणली गेली.
आंचलने सांगितले की, घटनेच्या दिवशी तिचा लहान भाऊ तिला पोलीस स्टेशनमध्ये घेऊन गेला आणि सक्षमविरुद्ध तक्रार दाखल करण्याचा दबाव टाकू लागला. ‘मी पोलिसांसमोर स्पष्ट सांगितले की सक्षमवर कोणताही गुन्हा दाखल करायचा नाही.’ यावेळी पोलिसात कार्यरत असलेले धीरज कोमलवार यांनी तिच्या भावाला सक्षमला मारण्याचा सल्ला दिला, असा खळबळजनक आरोप आंचलने केला आहे. तिच्या म्हणण्यानुसार, कोमलवार यांनी तिच्या भावाला उद्देशून म्हटले, “रोज भांडणं करून इथे येतोस… ज्या मुलासोबत तुझ्या बहिणीचं प्रकरण आहे, त्यालाच संपवून ये!”
यानंतर आंचलचा भाऊ संतापाच्या भरात बोलला, “त्याला मरूनच इथं येतो…” आणि काही तासांतच सक्षमची हत्या झाली, असे आंचलने सांगितले. आंचल आणि सक्षम गेल्या तीन वर्षांपासून प्रेमसंबंधात होते. मात्र जातिव्यवस्थेचा अडथळा आंचलच्या कुटुंबीयांनी उभा केला. सक्षम काही दिवसांपूर्वीच कारावासातून बाहेर आला होता. त्यानंतर कुटुंबीय सक्षमच्या जीवाला धोका निर्माण करत असल्याचे आंचलने सांगितले.
आंचल म्हणाली, माझे वडील आणि भाऊ त्याला मारण्यासाठी कट रचत होते. त्यांनी सक्षमला ठार मारलं, पण ते हरले… कारण सक्षम मरूनही जिंकला. तिने पुढे मागणी केली की, तिच्या वडिलांना आणि भावाला कठोर फाशीची शिक्षा दिली जावी. या प्रकरणात पोलिसांनी आंचलचे वडील गजानन मामीलवाड यांच्यासह पाच जणांना अटक केली आहे.
