Case Registered Against Santosh Bangar : राज्यातील स्थानिक स्वराज्य संस्थांच्या निवडणुकांसाठी चालू असलेल्या मतदानादरम्यान हिंगोली जिल्ह्यातील कळमनुरी येथे मोठी खळबळ उडाली. शिवसेना शिंदे गटाचे आमदार संतोष बांगर मतदान केंद्रातच वादाच्या भोवऱ्यात सापडले असून, मतदानाच्या गोपनीयतेचा भंग आणि आचारसंहितेचे उल्लंघन केल्याचा आरोप त्यांच्यावर झाला आहे. या घटनेचा व्हिडिओ सोशल मीडियावर समोर आल्यानंतर त्यांच्याविरोधात गुन्हा दाखल करण्यात आला आहे.
मंगळवारी बाजार परिसरातील मतदान केंद्र क्रमांक 3 येथे सकाळी आमदार बांगर मतदानासाठी पोहोचले. त्यावेळी तेथील एका महिला मतदाराला ईव्हीएमवर कोणते बटण दाबायचे याबाबत त्यांनी मार्गदर्शन केल्याचे दिसते. याचदरम्यान मतदान केंद्राच्या आत स्वर्गीय बाळासाहेब ठाकरेंचा विजय असो तसेच एकनाथ शिंदे आगे बढ़ो हम तुम्हारे साथ हैं अशा घोषणा दिल्या गेल्याचेही व्हिडिओमध्ये आढळते. केंद्राच्या आत मोबाइल फोनचा वापर केल्याचाही आरोप आहे.
हेही वाचा –संतोष बांगर यांच्याकडून मतदानाच्या गोपनीयतेचा भंग; नेमकं काय घडलं? वाचा सविस्तर वृत्त
नियमांनुसार मतदान केंद्रात घोषणा देणे, मतदाराला सूचना करणे अथवा मोबाइल वापरणे हे सर्वच प्रकार थेट गोपनीयतेचा भंग मानले जातात. त्यामुळे या व्हिडिओनंतर संतोष बांगरांविरुद्ध कारवाईची मागणी जोर धरू लागली. व्हिडिओ समोर आल्यानंतर निवडणूक निर्णय अधिकाऱ्यांनी चौकशीचे आदेश दिले होते. अहवाल मिळाल्यानंतर हिंगोली शहर पोलिसांनी आमदार संतोष बांगर यांच्यावर गुन्हा नोंदवला असून, ही कारवाई त्यांच्यासाठी मोठा धक्का मानली जात आहे.
दरम्यान, या प्रकरणावर राज्याचे मुख्यमंत्री देवेंद्र फडणवीस यांनीही तीव्र नाराजी व्यक्त केली. “लोकप्रतिनिधींनी लोकशाही प्रक्रियेला मान देणे ही मूलभूत अपेक्षा आहे. निवडणुकीच्या दिवशी आपण दिलेली वागणूक समाजात कोणता संदेश देईल याचा विचार करावा, अशा शब्दांत फडणवीस यांनी बांगर यांना फटकारले आहे.
