Gadchiroli Accident: गडचिरोली जिल्ह्यातून मोठी बातमी समोर येत आहे. राजकारण आणि सामाजिक कार्यात सक्रिय असलेल्या राष्ट्रवादी काँग्रेस (अजित पवार गट)च्या महिला प्रदेश उपाध्यक्षा गीताताई हिंगे यांचे पाचगाव परिसरात झालेल्या भीषण अपघातात निधन झाले. रविवारी रात्री हा अपघात झाला.
विरुद्ध दिशेने आलेल्या वाहनाची जोरदार धडक
प्राप्त माहितीनुसार, रविवारी खाजगी कामासाठी नागपूरला गेलेल्या गीताताई हिंगे या रात्री उशिरा गडचिरोलीकडे परतत होत्या. पाचगावजवळ त्यांच्या कारला विरुद्ध दिशेने आलेल्या वाहनाने जोरदार धडक दिली. धडक इतकी जबर होती की त्यांचा जागीच मृत्यू झाला. त्यांच्या पतींना किरकोळ दुखापत झाली असून स्थानिक नागरिकांनी तत्काळ मदतकार्य सुरू केले. पोलिसांनी घटनास्थळी पंचनामा करून पुढील तपास सुरू केला आहे.
हेही वाचा –पुण्यातील नवले पुलाजवळ अपघातांची मालिका सुरुचं; स्कूल बस अन् कारची धडक
भाजपमध्ये दीर्घ काळ विविध जबाबदाऱ्या सांभाळल्यानंतर नगराध्यक्षपदाचे तिकीट नाकारल्यामुळे गीताताई हिंगे यांनी काही महिन्यांपूर्वीच पक्ष सोडला होता. 26 नोव्हेंबर 2025 रोजी त्यांनी राष्ट्रवादी काँग्रेस (अजित पवार गट)मध्ये प्रवेश केला आणि लगेचच त्यांना महिला प्रदेश उपाध्यक्षपदाची महत्त्वाची जबाबदारी देण्यात आली. त्यांच्या आगमनाने पक्षसंघटनात नवी ऊर्जा निर्माण होईल, अशी अपेक्षा व्यक्त करण्यात आली होती.
सामाजिक क्षेत्रातील प्रभावी कार्य
राजकीय क्षेत्रासह गीताताई हिंगे यांनी समाजसेवेलाही तितकाच प्राधान्य दिले. आधार विश्व फाउंडेशनच्या अध्यक्ष या नात्याने त्यांनी गरजू नागरिकांसाठी अनेक उपक्रम राबवले. विशेषतः कोरोनाच्या काळात अन्न, औषधे आणि अत्यावश्यक साहित्य वितरणात त्यांनी महत्त्वाची भूमिका बजावली होती. त्यांच्या परोपकारी कामाची जिल्ह्यात मोठी दखल घेतली गेली होती.
