Solapur Crime: राज्यभर चर्चेत आलेल्या न्यूरोफिजिशियन डॉ. शिरीष वळसंगकर यांच्या आत्महत्येच्या तपासात नवी माहिती समोर आली आहे. पोलिसांच्या नोंदीनुसार 18 एप्रिलच्या रात्री सुमारे 8.40 वाजता त्यांनी आत्महत्या केली. मात्र, त्याआधी काही तासांत त्यांना हॉस्पिटलमधील एका महिला कर्मचाऱ्याचे सलग तीन महत्त्वाचे फोन कॉल आले असल्याचा दावा आरोपीची बाजू मांडणारे वकील अ‍ॅड. प्रशांत नवगिरे यांनी न्यायालयात केला.
आत्महत्येच्या दोन दिवस आधी ‘वेगळ्या’ कॉलची मालिका
डॉ. वळसंगकर यांच्या आत्महत्येप्रकरणात संशयित म्हणून अटक झालेल्या मनीषा मुसळे माने यांचे वकील अ‍ॅड. नवगिरे यांनी सांगितले की, आत्महत्येच्या दोन दिवस आधी म्हणजेच 16 व 17 एप्रिलला पी. राऊत नावाच्या महिला कर्मचाऱ्याने डॉक्टरांना वारंवार फोन केला होता. ही पी. राऊत वळसंगकर हॉस्पिटलमध्ये काम करतात आणि प्रकरणातील साक्षीदार आहे. नवगिरे यांच्या मते, गेल्या काही महिन्यांतील कॉलचा तपशील तपासल्यास या प्रकरणातील धागेदोरे अधिक स्पष्ट होतील. डिसेंबर 2024 ते 1 मे 2025 या कालावधीत डॉ. वळसंगकर, पी. राऊत आणि आर. राऊत यांचे कॉल डिटेल रेकॉर्ड्स आणि टॉवर लोकेशन्स तपासावेत, अशी मागणीही यावेळी वकिलांनी केली.
आत्महत्येच्या थोड्याच आधीचे शेवटचे फोन कॉल
दरम्यान, या महिलेशी वळसंगकर यांनी काय संवाद साधला? या कॉल्सची गरज काय होती, असा ठोस प्रश्न नवगिरे यांनी न्यायालयात उपस्थित केला. 18 एप्रिलच्या रात्री आत्महत्येच्या आधी डॉक्टरांना प्रथम तीन कॉल त्याच महिला कर्मचाऱ्यांकडून आले आणि नंतर त्यांचा मुलगा डॉ. अश्विन यांचा कॉल आला, असे वकिलांनी सांगितले. यानंतर काही मिनिटांतच आत्महत्येची घटना घडली.
चार महिन्यांचे सीडीआर तपासा
अ‍ॅड. नवगिरे यांनी न्यायालयात सांगितले की, या प्रकरणात राऊत आडनावाच्या दोन महिलांचा नेमका संबंध काय आहे हे स्पष्ट करणे आवश्यक आहे. त्यामुळे चार महिन्यांचे कॉल डिटेल्स तपासणे अत्यावश्यक असल्याचे त्यांनी नमूद केले. सरकारतर्फे या प्रकरणातील बाजू अ‍ॅड. प्रदीपसिंग राजपूत यांनी मांडली. पुढील सुनावणींमध्ये आणखी कोणती माहिती पुढे येते, हे याकडे आता सर्वांचे लक्ष लागले आहे.
