Teacher Recruitment Scam: शिक्षक भरती आणि पगार वाटपातील करोडो रुपयांच्या गैरव्यवहार प्रकरणी विशेष तपास पथकाने (SIT) नागपूर जिल्हा परिषदेचे माजी शिक्षणाधिकारी रवींद्र काटोलकर यांना अटक केली आहे. ‘शालार्थ’ ऑनलाइन वेतन प्रणालीचा गैरवापर करून शासनाची फसवणूक केल्याच्या आरोपाखाली ही कारवाई करण्यात आली असून, शिक्षण क्षेत्रात यामुळे मोठी खळबळ उडाली आहे.
काय आहे नेमकं प्रकरण?
नागपूर विभागाच्या शिक्षण उपसंचालक कार्यालयाने दिलेल्या तक्रारीवरून हा संपूर्ण घोटाळा उघडकीस आला. तपासात असे समोर आले आहे की, शालार्थ प्रणालीमध्ये बेकायदेशीरपणे शिरकाव करून बनावट ‘शालार्थ आयडी’ तयार करण्यात आले. अस्तित्वात नसलेल्या शिक्षक आणि कर्मचाऱ्यांच्या नावे वेतन काढून शासनाची सुमारे 12 कोटी रुपयांहून अधिक रकमेची फसवणूक करण्यात आली. काटोलकर हे 2021 ते 2022 दरम्यान शिक्षणाधिकारी असताना, त्यांनी बनावट ओळखपत्रांची माहिती असूनही कोणतीही शहानिशा न करता पगाराचे प्रस्ताव मंजूर केले. दरम्यान, या प्रकरणी एसआयटीने आतापर्यंत एकूण 26 जणांना गजाआड केले आहे. यामध्ये शिक्षण उपसंचालक, शिक्षणाधिकारी, लिपिक, मुख्याध्यापक आणि शाळा संचालकांचा समावेश आहे. या सर्वांविरुद्ध न्यायालयात दोषारोपपत्रही दाखल करण्यात आले आहे.
२५ डिसेंबरपर्यंत पोलीस कोठडी
अटक करण्यात आलेले रवींद्र शंकरराव काटोलकर यांना मंगळवारी न्यायालयात हजर करण्यात आले. न्यायालयाने त्यांची बाजू ऐकून घेतल्यानंतर त्यांना 25 डिसेंबरपर्यंत पोलीस कोठडी सुनावली आहे. या काळात त्यांच्याकडून या घोटाळ्यातील आणखी धागेदोरे आणि आर्थिक व्यवहारांची माहिती मिळण्याची शक्यता पोलिसांना आहे.
