Prakash Mahajan Join Shiv Sena : महाराष्ट्र नवनिर्माण सेनेचे ज्येष्ठ नेते प्रकाश महाजन यांनी अखेर राज ठाकरे यांची साथ सोडून उपमुख्यमंत्री एकनाथ शिंदे यांच्या नेतृत्वाखालील शिवसेनेत अधिकृत प्रवेश केला आहे. या पक्षप्रवेशानंतर महाजन यांनी ठाकरे बंधूंच्या संभाव्य युतीवर कडाडून टीका केली असून, शिंदेंच्या कार्यपद्धतीचे तोंडभरून कौतुक केले आहे.
‘दोघे भाऊ एकत्र आले तरी अंधार चुकणार नाही’
उद्धव ठाकरे आणि राज ठाकरे यांच्यातील वाढत्या जवळीकीवर भाष्य करताना प्रकाश महाजन म्हणाले की, अंधारात एकटे जाण्यापेक्षा दोघे भाऊ एकत्र जाऊ अशी भूमिका त्यांनी घेतली आहे, पण त्यांच्या नशिबी असलेला अंधार आता कोणालाही टाळता येणार नाही. २० वर्षांचा दुरावा अवघ्या १० मिनिटांत कसा काय संपू शकतो? दोघांनीही हिंदुत्व सोडले आहे. एकदा का जागावाटप जाहीर झाले की, त्यांच्यासोबत कोणीही उरणार नाही.
राज ठाकरेंना ‘औषधा’चा टोला
एकनाश शिंदेंच्या उपलब्धतेचे कौतुक करताना त्यांनी राज ठाकरे यांना नाव न घेता चिमटा काढला. महाजन म्हणाले, एकनाथ शिंदे हे रात्री कितीही वाजता कार्यकर्त्यांना भेटणारे नेते आहेत. गुरुवारी रात्री १२ वाजता मी त्यांना भेटलो, तेव्हाही ते तितक्याच उत्साहात होते. बाकीचे काही लोक तर ‘औषध’ घेऊन लवकर झोपतात. एकनाथ शिंदेंच्या शिवसेनेत प्रवेश करण्यामागची कारणे स्पष्ट करताना महाजन म्हणाले की, मला हिंदुत्वासाठी काम करायचे होते आणि शिंदे साहेब खऱ्या अर्थाने हिंदुत्वाविषयी जागरूक आहेत. एवढ्या मोठ्या पदावर असूनही ते स्वतःला ‘नेता’ न समजता कार्यकर्त्याचा माणूस समजतात, हा त्यांचा मोठेपणा आहे. जातीयवादाने महाराष्ट्र पेटलेला असताना शिंदेंनी अतिशय संयमाने परिस्थिती हाताळली.
