Prashant Jagtap : आगामी पुणे महानगरपालिका निवडणुकीच्या तोंडावर पुणे शहराच्या राजकारणाला मोठी कलाटणी मिळाली आहे. राष्ट्रवादी काँग्रेस (शरदचंद्र पवार) पक्षाचे शहराध्यक्ष प्रशांत जगताप यांनी अखेर ‘घड्याळा’ची साथ सोडून अधिकृतपणे काँग्रेसचा झेंडा हाती घेतला आहे. मुंबईतील टिळक भवन येथे प्रदेशाध्यक्ष हर्षवर्धन सपकाळ आणि विधानसभा विरोधी पक्षनेते विजय वडेट्टीवार यांच्या उपस्थितीत हा पक्षप्रवेश सोहळा पार पडला.
पुणे महापालिकेसाठी राष्ट्रवादीच्या दोन्ही गटांत (शरद पवार आणि अजित पवार) पडद्यामागे सुरू असलेल्या तडजोडीच्या चर्चांमुळे जगताप प्रचंड नाराज होते. भाजपशी हातमिळवणी करणाऱ्या कोणाशीही आपण युती करणार नाही, अशी आक्रमक भूमिका घेत त्यांनी काल आपल्या पदाचा तडकाफडकी राजीनामा दिला. या राजीनाम्यामुळे पुण्यात खळबळ उडाली असतानाच, अवघ्या काही तासांत त्यांनी काँग्रेसमध्ये प्रवेश करून सर्वांना धक्का दिला.
हेही वाचा – पुणे महापालिका निवडणुकीपूर्वी मोठी राजकीय उलथापालथ; काँग्रेस-उद्धव ठाकरेंची शिवसेना एकत्र येणार?
उद्धव ठाकरेंचा ‘९ मिनिटांचा’ तो फोन कॉल…
प्रशांत जगताप यांना आपल्या गोटात खेचण्यासाठी शिवसेना (UBT) प्रमुख उद्धव ठाकरे यांनी स्वतः पुढाकार घेतला होता. गुरुवारी रात्री उद्धव ठाकरे आणि जगताप यांच्यात सुमारे 9 मिनिटे फोनवर चर्चा झाली. आमचा पक्ष भाजपसोबत कधीही जाणार नाही, तुम्ही आमच्याकडे या, तुमचा योग्य सन्मान केला जाईल, असे आमंत्रण ठाकरेंनी जगताप यांना दिले होते. उद्धव ठाकरेंनी एका कार्यकर्त्याला फोन केल्याबद्दल जगतापांनी त्यांचे आभार मानले, मात्र आपली विचारधारा काँग्रेसशी अधिक जुळत असल्याचे सांगत त्यांनी शिवसेनेची ऑफर नम्रपणे नाकारली.
काँग्रेसच का? जगतापांनी मांडली भूमिका
पक्षप्रवेशानंतर बोलताना प्रशांत जगताप यांनी आपली भूमिका स्पष्ट केली. माझी लढाई कोणा व्यक्तीविरोधात नसून संविधान आणि पुरोगामी विचारधारेसाठी आहे. महायुतीला आणि भाजपला प्रखर विरोध करण्यासाठी काँग्रेस हाच सक्षम पर्याय आहे. मी मूळचा काँग्रेस विचारधारेचा कार्यकर्ता असल्याने घरी परतल्याची भावना आहे, असं जगताप यांनी नमूद केलं.
