Angkrish Raghuvanshi Injury : जयपूरच्या सवाई मानसिंग स्टेडियमवर सुरू असलेल्या विजय हजारे ट्रॉफीच्या सामन्यात मुंबईचा फलंदाज अंगकृष रघुवंशी एका भीषण अपघाताचा बळी ठरला. सीमारेषेवर झेल पकडण्यासाठी ‘डायव्ह’ मारताना अंगकृषच्या मानेला गंभीर दुखापत झाली. परिस्थिती इतकी बिकट होती की, त्याला मान हलवणेही कठीण झाले होते, अखेर त्याला स्ट्रेचरवरून मैदानाबाहेर नेऊन तातडीने रुग्णालयात दाखल करावे लागले.
नेमकी घटना कशी घडली?
उत्तराखंडच्या डावादरम्यान क्षेत्ररक्षण करताना अंगकृषने एक कठीण झेल पकडण्यासाठी हवेत झेप घेतली. मात्र, जमिनीवर आदळताना त्याच्या शरीराचा समतोल बिघडला आणि थेट मानेवर भार पडला. या धक्क्यामुळे त्याला तीव्र वेदना होऊ लागल्या आणि तो जागेवरून हलूही शकला नाही. या घटनेचे व्हिडिओ सोशल मीडियावर व्हायरल झाले असून क्रिकेट चाहत्यांमध्ये चिंतेचे वातावरण आहे.
रोहित शर्मा शून्यावर बाद
या सामन्यात भारतीय कर्णधार रोहित शर्मा मुंबईकडून सलामीला आला होता, मात्र तो पहिल्याच चेंडूवर बाद (Golden Duck) झाला. त्याचा जोडीदार अंगकृष रघुवंशीने 11 धावा केल्या. हार्दिक तामोरेच्या स्फोटक नाबाद 93 धावा आणि शम्स मुलानीच्या 48 धावांच्या जोरावर मुंबईने 300 धावांचा टप्पा ओलांडला.
Rohit Sharma’s team opener, Angkrish Raghuvanshi, got injured and was referred to the hospital in an emergency. He was taken off the field on a stretcher.🥺
Hope for everything will be good🙏 pic.twitter.com/ADBkrRHk2V
— 𝐑𝐮𝐬𝐡𝐢𝐢𝐢⁴⁵ (@rushiii_12) December 26, 2025
सामन्याचा निकाल
उत्तराखंडकडून सलामीवीर युवराज चौधरीने 96 धावांची झुंजार खेळी केली, तर जगदीश सुचितनेही 51 धावांचे योगदान दिले. मात्र, मुंबईच्या आव्हानासमोर त्यांची ही झुंज अपुरी ठरली. तथापी, प्राथमिक माहितीनुसार, अंगकृषची दुखापत सुरुवातीला वाटते तितकी गंभीर नसावी असा अंदाज आहे. मात्र, त्याच्या मानेचे स्कॅनिंग आणि वैद्यकीय चाचण्या पूर्ण झाल्यानंतरच तो पुन्हा कधी मैदानात उतरणार, हे स्पष्ट होईल.
