Nashik Election: राज्यातील 29 महापालिकांच्या निवडणुकीचा बिगुल वाजला असून, नाशिकमध्ये राजकीय समीकरणे वेगाने बदलू लागली आहेत. छगन भुजबळ यांचे अत्यंत विश्वासू आणि कट्टर समर्थक मानले जाणारे कैलास मुदलियार यांनी राष्ट्रवादी काँग्रेसची (अजित पवार गट) साथ सोडून एकनाथ शिंदे यांच्या शिवसेनेत प्रवेश केला आहे. या पक्षांतरामुळे नाशिकच्या राजकारणात खळबळ उडाली असून, भुजबळांच्या वर्चस्वाला सुरुंग लागल्याची चर्चा रंगली आहे.
नेमका पेच काय?
नाशिकमध्ये सुहास कांदे (शिंदे गट) आणि छगन भुजबळ (अजित पवार गट) यांच्यातील राजकीय वैर सर्वश्रुत आहे. महायुतीत एकत्र असूनही या दोन्ही नेत्यांमधील वाद कमी होत नाहीत. अशातच भुजबळांच्या जवळच्या सहकाऱ्याला आपल्या गोटात खेचून शिंदे सेनेने भुजबळांची कोंडी करण्याचा प्रयत्न केला आहे. नाशिकमधील शिवसेनेच्या कार्यालयात मंत्री दादा भुसे यांच्या उपस्थितीत मुदलियार यांचा जाहीर प्रवेश झाला. कैलास मुदलियार हे नाशिक मनपाच्या प्रभाग क्रमांक 20 मधून निवडणूक लढवण्याची शक्यता आहे.
भाजपची ‘वेट अँड वॉच’ची भूमिका
शिंदे गट आणि राष्ट्रवादीतील या वादाचा फायदा घेत नाशिकमध्ये भारतीय जनता पक्ष (BJP) स्वबळावर निवडणूक लढवण्याच्या हालचाली करत असल्याची माहिती समोर येत आहे. महायुतीच्या जागावाटपाची चर्चा सुरू असतानाच, मित्रपक्षांमधील या ‘इनकमिंग’ आणि ‘आऊटगोइंग’मुळे मित्रपक्षांमध्ये अविश्वासाचे वातावरण निर्माण झाले आहे. महापालिका निवडणुकीत नाशिकमध्ये कोणाचा वरचष्मा राहणार? आणि भुजबळ आपल्या समर्थकाच्या जाण्याने झालेले नुकसान कसे भरून काढणार, याकडे आता सर्वांचे लक्ष लागले आहे.
